AAP-in an MLA-te Rs. Vbc 15 zela lei tumah BJP puh

AAP-in an MLA-te Rs. Vbc 15 zela lei tumah BJP puh
Aam Aadmi Party (AAP) hruaitu, Sanjay Singh chuan Delhi assembly inthlan hma lawk khan BJP chuan an party hruaitute chu sumin an thlem niin a sawi a. Rajya Sabha MP hian inthlana ding ve AAP MLA pasarihte chu Rs. vaibelchhe 15 theuh pein BJP zawm turin an sawm tih a sawi.
“Inthlemna thenkhat phei hi chu hmaichhana inbiakna ngei a ni,” a ti a. “Hei hian chiang taka a lantir chu result a chhuah hma atang tawhin BJP hian an tlawm tih an pawm tawh tih a ni a, chu chu hetianga an chet chhan pawh hi a ni,” tiin Ningania thuthar lakhawmtute a kawmnaah a sawi.
MP hian an party chuan an candidate-te chu hetianga inbiakna chu record vek turin an chah a, hmaichhana inbiak a awm palh pawhin an hman turin spy camera an pek vek thu a sawi bawk.
BJP chuan he puhna hi an la chhang lo.
Delhi-ah hian Nilaini khan bial 70 awmah mipuiten vote an thlak tawh a, chuhtu mi 699 an awm.
Ram khawpui berah hian vote 60.42% a tla a, a tla tha hle niin Election Commission of India (ECI) chuan a tar lang.
Inthlan campaign boruak kha a tang hle a, bial tinah party tinin mipui vote lak tumin an bei nasa a, candidate-te pawh an inbei nasa hle.
Inrinni hian vote tlate chhiar a ni dawn a, AAP-in a zawna a vawi thum nan sorkar an siam leh dawn nge BJP-in kum 27 an lo nghah tawh rorelna an chang dawn em tih a chiang ang.
Delhi inthlana vote thlak zawha exit poll hrang hrangah chuan BJP chu sorkar siam leh tura hmuh lawk deuh vek a ni a. AAP-in dawtin Congress chu che chhe leh hle tura ngaih a ni.
Exit poll hrang hrangte hmuh dan a inang vek lo va; mahse, an vaiin BJP chak turin an dah deuh vek a, pakhat phei chuan bial 70-ah hian bial 51-60 zet la turin a dah a. Hetih lai hian poll pahnih chuan AAP chak turin a dah ve tho bawk.