India leh US defence minister-ten thawhhona tur sawi dun

India leh US defence minister-ten thawhhona tur sawi dun
Indian Defence Minister Rajnath Singh leh US Secretary of Defence Pete Hegseth te chu Ningani khan inbiain kum 10 chhunga thawhhona tur duangin ram venhimnaa India-US inkungkaihna turte an sawi a. Heng zingah hian hnu chhuina, beihpui thlakna leh industry lama inpuih tawnna turte a tel.
Singh leh Hegseth hi Prime Minister Narendra Modi-a’n karleha Washington a tlawh hma lawka phone-a inbiain ram pahnihin venhimna lama thawhhona an neih mekte pawh an sawi dun.
Tun hi January 25-a Hegseth-a defence secretary a nih atanga Singh-a nena phone-a an inbiak hmasak berna a ni.
An inbiaknaah hian ram pahnihte hian venhimna lama an thawhho theihna turte sawiin an duang a, hei hi kum 2025-2035 chhung kalpui tur thil a ni ang.
Singh leh Hegseth hian venhimnaa India-US thawhhona kalpui mek dante pawh an sawi a, ‘khawmual, boruak, tuipui leh van thenrenga an chet dun dan’ pawh an sawi.
Defence minister hian Hegseth-a nen hian thawhhona kal mek bakah zau leh thuk zawka inkungkaihna a awm theih dan turte an sawi tih X-ah a tar lang a. An inbiakna dan chu ‘duhthusam’ a nih thu a sawi bawk.
“Kan thawhhona tura kan hmabakte pawh sawiin beihpui thlak, hnuchhui, ram inkawhhmuh leh venhimna hmanraw siamnaa thawhhona te pawh kan sawi tel a ni,” a ti.
Modi leh US President Donald Trump-a pawh January 27 khan phone-a lo inbe tawhin sumdawnna, energy leh venhimnaa India-US thawhhona tichak lehzual theih dan tur an sawi dun.
Singh leh Hegseth te phone-a an inbiak hi India-a US-in dan lova a rama Indian 100 chuang indo thlawhna hmanga a phurh haw boruak a len lai tak a ni bawk.
Ruahmanna awm sa ang chuan Modi-a hian karlehah hian ni hnih chamin Washington DC a tlawh ang a. Prime minister hian American khawpui hi February 12 zanah thlengin a tukah Trump-a nen an inkawm ang.
Prime minister hi January 20-a president atana Trump-a lak luh a nih hnua US a tlawh hmasak ber tur a ni a, ram dang hruaitu zinga a vawi hnih president nihnaa White House tlawh hmasa pawl a ni dawn bawk.