Aam Aadmi Party Mizoram chuan Zirtawpni khan Hunthar Primary School-ah tuizem an pe.
AAP Mizoram State president Andrew Lalremkima chuan nu leh pa leh zirlaite hmaah thu sawiin, thilpek hi hmingthat duhna emaw intihlar duhna avanga pe an ni loa, school-a naupangten tui thianghlim leh hrisel zawk an in theihna’na ti an ni tih a sawi. Hunthar P/S ang bawkin Mizoram hmun hrang hranga zirlai naupangten ngaihsak an phu hle, tiin, “Sawrkarna fawng chelhtuten zirlaite leh zirna an ngaihsak lo chhunzawm zel dawn a nih chuan AAP Mizoram chuan a tul angin hma kan la zel dawn. Ram hmasawnna chu zirna tha leh zirlaiteah thui tak a innghah avangin, zirna hi ngaihpawimawh hmasak a tul a ni,” a ti. Zirtirtute pawh AAP-in sawrkarna a chang a nih chuan zirna kaihhnawih bak eng hna mah pek an ni dawn lo tih a sawi bawk.
Hetianga school-a an tih ngam chhan chu, sawrkar school kan tihten neitu an neiloa an hriat vang a ni tih Andrew Lalremkima hian sawiin, “AAP Mizoram chuan zirna bakah corruption, health, kuthnathawktute leh thildang a ngaipawimawh a, hemi lama hma la thei tur hian zirchian mek a ni,” a ti.
AAP-in school-ah tuizem pe
Get real time updates directly on you device, subscribe now.