BSP supremo Mayawati chuan Opposition party inhmuhkhawm Patna a Bihar Chief Minister Nitish Kumar an a koh chu thinlung lam aiin kut insuih duhna lam a ni a ti.
Meeting-ah hian Mayawati hi tel tura sawm tel a ni lo va, JD(U) chief spokesperson KC Tyagi chuan, “Kum 2024 inthlana BJP te hneh tuma duh zawng te chauh kan sawm” tiin a sawi a.
“BSP te chuan tangrualah an tel loh tur thu an sawi tawh a, eng vangin nge kan sawm ang” tiin a sawi bawk.
He meeting a tel tura tichiang party te chungchang sawiin Mayawati chuan an riltu puthmang atangin Uttar Pradesh-ah an thil tum a chiang lo a ti ve thung.
“UP a Lok Sabha seat sawm riat te chu inthlana chak nana pawimawh a ni a, mahse opposition te rilru puthmang leh chetdan en hi chuan Uttar Padesh-a an thil tum hi a chiang lo. Ngaih pawimawh neih fuh loh chuan Lok Sabha inthlana inpuahchahna te hian inthlak danglamna mamawh a thlen dawn em ni?” tiin a sawi.
Uttar Pradesh chief minister hlui chuan, “India rama Bahujans te dinhmun chhut chuan BJP leh congress party ang te hi chuan BR Ambedkar a humanitarian egalitarian constituion hi a takin an kalpui thei lo” tiin a sawi bawk.
Chutiang zawnga thlir chuan June 23 a Nitish Kumar-an Patna a Opposition leader meeting a koh hi chu thinlung lam aiin kut insuih tumna lam a ni tiin a sawi bawk.
Lok Sabha inthlana inpuah chahna hisap chuan heng party te hian an tum tichiang viau se la mipui nawlpui rilruah beiseina dik tuh thei zawk se a fuh ang a ti bawk.
“Hmaichhana sawia hnung lama invih leh si hian engtia rei nge a daih ang?” tiin Mayawati chuan zawhna a siam bawk.
Zirtawpni hian India rama opposition hruaitu lawkte chuan Patna khawpuiah kum 2024 Lok Sabha inthlana BJP te beihlet dan tur an duang dawn a.
He inhmuhkhawmnaah hian Congress president Mallikarjun Kharge, party leader Rahul Gandhi, West Bengal Chief Minister Mamata Banerjee, Delhi counterpart and AAP convener Arvind Kejriwal, Jharkhand CM Hemant Soren, Maharashtra chief minister Uddhav Thackeray leh NCP president Sharad Pawar te pawh an tel dawn a ni.
Bihar chief minister leh a deputy Tejashwi Yadav te thlen tur niin UP atangin Samajwadi Party chief Akhilesh Yadav chu a tel thung ang.
Mayawati tel loh tur chungchanga zawhna chhangin Tyagi chuan, “BSP te hi kan sawm lo chungin eng vangin nge an telloh tur thu an la sawi hram” tiin a sawi.
-- Advertisement --
AAP in chhuahsan inpeih
AAP chief Arvind Kejriwal chuan June 23 a non-BJP party opposition inhmuhkhawmnaa tel tur leader te hnenah lehkhathawnin inhmuhkhawm neihnaah Central sorkarin Delhi a ordinance a kalpui chu “unconstitutional” leh “anti-Delhi” tia pawm tura ngenin meeting neih hunah pawh ngaihtuah hmasak ber a phut bawk.
Hei mai bakah hian party hrang hrangte chu he thilah hian an dinna chiang taka sawi lang turin a ngen bawk a ni.
AAP supremo chuan Congress te chuan he subject-ah hian an dinna chiang takin an sawi tur a ni a ti a. Kejriwal an hmuh a ngiata a beih reng chung pawhin ordinance chungchangah hian Congress leader Rahul Gandhi chuan hun remchang a la pe duh lo bawk.
Lehkhathawnah Kejriwal chuan ordinance chu Delhi tana harsatna chauh a ni lo va, hetiang ordinance hi State dangah pawh central sorkar chuan a kalpui theih reng a ni tiin a sawi bawk.
“Pakhat te te in state dangah pawh democracy nuairal an tum dawn a, Prime Minister chuan state sorkar tin te Governor leh Lieutenant Governor hmangin a thunun dawn a ni” tiin Kejriwal chuan a sawi bawk.
May 19 khan Centre chuan ordinance tichhuakin Government of National Capital Territory (NCT) of Delhi Act, 1991 siamthatna a ni a, hemi hmang hian May 11 a Supreme Court in AAP sorkar chu Delhi sorkar hnuaia dan siam leh bureaucrats te thununa thuneihna a pek, public order, police leh land tihloh zawng chu hnawlin a awm dawn a ni.