Zirna leh hnathawk ngai pawimawh

Hmasawnna awm tir reng tur chuan India leh US in ‘pipeline of talent’ a mamawh tia sawiin Prime Minister Narendra Modi chuan ram pahnihte chuan education leh workforce lamah ngaihpawimawh intawm an nei a ni tiin a sawi.
PM Modi hian Virginia a hmunpui nei National Science Foundation (NSF) tena “Skilling For Future Event” First Lady Jill Biden in a thlenah thusawina a nei a.
He event ah hian higher education institution hrang hranga workforce redevelopment tihlen leh quality education tihchangtlun lam kalpuina an thlurbing a ni.
Prime Minister chuan education, skilling leh innovation lama India in hma a lak dan te sawi lanna a nei a. Tunlaia ram pahnih tena academic exchange an kalpui mek te, Indian leh US academic tena research ecosystem lama thawhhona an neih te a sawi lang.
“Helai hmuna thalai thluak tha ber ber te nena inkawmna hun kan nei hi ka lawm a. India chuan NSF te nen project hrang hrangah thawhhona kan nei mek a. He event hlawhtlin theih nana First Lady Jill Biden ruahmanna leh hmalakna hi ka fak a ni” tiin Modi chuan a sawi.
National Education Policy (NEP), education leh skilling te chu belhbawm vek tawh a ni a. Skilling Mission hnuaiah 50 million chuang te train an ni thawh a, artificial intelligence leh blockchains tehnology lamah thalai maktaduai 15 te training pekleh mek a ni tiin PM Modi chuan a sawi bawk.
Hmasawnna tikal zel turin India leh US te chuan talent mamawh tawk a neih reng a ngai tia sawi bawkin a tum ber chu tun kum sawm chhung hi ‘tech decade’ a siam a ni, a ti bawk a.
US chuan khawvela educational institution leh advanced technology tha ber ber a nei vek a ti a, India erawh khawvela youth factory lian ber a ni thung tia sawiin Prime Minister Modi chuan India-US thawhdunna chu global growth atana pawimawh tawpkhawk tiin a sawi bawk.
Prime Minister Modi chuan India-U.S.A. tena education and research sector lama thawhdunna tha an neih zui zel theih nan rawtna panga a siam bawk a.
“Sorkar, industry leh academia te lungruala an kalho theih dan tura kalpui a ngai a. Teachers & Students exchange kan uar a ngai a. Ram pahnih ten subject hrang hrangah Hackathons buatsaiha kalpui a ngai a. Vocational skills qualifications te kan pawm tlan dun a ngai bawk a. Education leh research lama mithiam te intlawh tawn nasat kan kalpui a ngai” tiin External Affiairs Ministry thuchhuah chuan a tarlang bawk.
He event-ah hian President of Northern Virginia Community College, President of Association of American Universities, President and CEO of Micron Technology, leh students te an tel a ni.
Prime Minister Modi chu US ah lawm a nih thu sawiin First Lady chuan, “He official visit hmang hian khawvela democracy upa leh lian ber te hi lungrualin kan siam thei a ni. Mahse, kan inlaichinna hi sorkar chauh a ni lo va, chhungkua leh inthian thatna te pawh a huam tel vek a ni” tiin a sawi bawk.
Kum tam tak hnuah US-India inlaichinna chu a thukin a zau tial tiala tangrualin khawvel harsatna te kan hmachhawn a ni a ti bawk.
“Prime Minister, keimah ang bawkin zirna hi i rilruah a lian tih ka hria a ni. Indian tinte a bik takin hmeichhia te tana zirna sang zawk an neiha tunlai mila thiamna an neih theih nan i thawk nasa tih ka hria a. Helai hmuna zirlaite tana school leh businesses tena innovative programme an siam kan hmuhtir thei che hi ka lawm a ni” tiin Jill Biden chuan a sawi.
NSF hi Indian American Dr. Sethuraman Panchanathan kaihhruai niin nikum pawh khan Indian Cabinet Minister rualte chuan Virginia an headquarter an tlawh tawh a, a tlawhtute zingah Finance Minister Nirmala Sitharaman leh External Affairs Minister S Jaishankar te pawh an tel.
NSF hi US sorkar hnuaia independent agency niin science leh engineering a non-medical field lama research leh education lam buaipui tu niin National Institutes of Health thawhpui te an ni bawk.
“He room ah hian middle leh high school emaw cutting edge job lama training nei semiconductor chhungril thawh dan zirte an awm a ni” tiin Jill Biden chuan a sawi a. “Kan economy chak tura kan duh a nih chuan kan thalaite kan ram hmalam hunte ah investment kan tih nasat a ngai a, an phu tawk dinhmun tha an chang tur a ni” tiin a sawi bawk.
Zirna hi India leh US inlaichinna bulthut ber pakhat a ni a, he intlawhna hmang hian tihchak zel kan tum dawn a ni, tiin Jill Biden chuan a sawi bawk.