Abujhmarh leh North Bastar-ah Naxal awm tawh lo – Shah
Abujhmarh leh North Bastar-ah Naxal awm tawh lo – Shah
Union Home Minister Amit Shah-a chuan ni hnih chhung lekin Chhattisgarh-ah Naxalite hel 258 an inpe tih sawiin tunah chuan Abujhmarh leh North Bastar chu Naxal awm lohna hmun a ni ta tih a sawi.
Shah hian Ningani khan India khawchhak lam, Naxal tamna hmuna hel inpe zat hi X-ah a tar lang a. “Naxalism kan beihnaah vawiin hian hlawhtlinna ropui tak kan chang a. Vawiin hian Chhattisgarh-ah Naxalite hel 170 an inpe a, nimin khan 27-in an ralthuam an tung tawh bawk a. Maharashtra-ah nimin khan mi 61 an inpe bawk a. Ni hnih lek chhung hian mi 258-in left-wing extremist nihna kalsanin nun phung pangngai zawm turin an rawn inpe a ni,” a ti.
Prime Minister Narendra Modi-a kaihhruaina hnuaia Naxalism beihna kawngah sorkarin hma a sawn zel tih sawiin, hmalaknate pawh a tar lang bawk.
“Hetianga tharum thawhna kalsan an tum thu puanga India danpui ringngama an inpe hi a lawmawm a. Prime Minister Narendra Modi-a kaihhruai sorkar hmalaknaa chawl lova Naxalism tihtawp tumna chuan rah tha leh kawng dik a zawh zel a ni,” tiin X-ah hian a tar lang bawk.
Sorkar dinna chu a chiang tih sawiin Shah chuan, “Kan kalphung chu thil chiang sa a ni a. Inpe duh chu kan lo lawm em em a, an ralthuam la lekte chu kan sipai huaisente nen an insut zel a ngai dawn a ni,” a ti.
Naxalite movement-a la inhnamhnawihte chu nunphung pangngai zawm zel turin a sawm bawk a. “Naxalism kawng la zawhte chu an ralthuamte tunga nunphung pangngai min rawn zawm ve turin ka sawm a ni,” a ti.
Shah hian India ram atangin Naxalism hi March 31, 2026-ah nuai bo an tum tih a sawi nawn leh a. “March 31, 2026 hma ngeiin kan nuai chimit vek ang,” a ti.
Sorkar laipui hian Naxal helte nuai bo vek tumin beihpui a thlak nasa hle a, tharuma a beih let bakah hian state sorkar nena tangkawpin an chet velna thin hmunah hmasawnna ruhrel thar tam tak a din a, inpete chu chhawmdawlna tur scheme a duang a, hei hian an zinga tam tak a hip a, inpe pawh an pung zel.
Venhim hnathawktuten tha thlah lova an beihna avangin hel pawl hruaitu lawk tak tak thah an ni fo bawk a, hei hian an pawl inkhaidiat a tibuai hle a, kawrawng awmin hei hi an zinga miten inpek duhna rilru an put chhan lian tak pakhat a ni bawk.