Adani Group chhuichian Cong ten phut zui zel

Congress-te chuan Gautam Adani u Vinod Adani an Australia a Adani Group’s port and mining project pathum enkawltu director nihna a bansan hnuah Adani controvery a thil awm dan dik tak hriatfiah a nih theih nana Joint Parliamentary Committee (JPC) neih an ngiat zui zel.
Thuchhuah a siamah Congress general secretary Jairam Ramesh chuan an party chuan ‘Adani mefa scam’ chngchangah Supreme Court in a ruat expert committee te thutlukna an la nghah mek thu a sawi a. Mahse, committee te thil chhui theihna chu khuahkhirhsak an ni tiin a sawi a.
“Chanchinthar lamah Gautam Adani unaupa Vinod chu Adani Group te Australia port and mning project kaihhnawih enkawltu director atangin a bang tih kan hria a. Vinod Adani hi a hma pawha ‘stock manipulation kalpuitu’ leh ‘accounting fraud’ kalpuitu ber puh a ni, tiin Ramesh chuan a sawi.
“Australia-ah pawh Abbot Point Port Holdings te chu amah Vinod ngei hian British Virgin Islands leh Cayman Islands a shell company te hmanga a thunun niin Adani Group leiba billion dollar tel te chu ram dangah dahin hei vang hian Adani Group tena investor te laka an hloh zat tak tak hriat theih a nih loh phah,” tiin Congress leader chuan a sawi bawk a.
Ramesh chuan Vinod Adani kaihhruai tho UAE a inbun shell company pahnih te chuan Australia a Carmichael project hnenah 3.3 billion dollar an puk tir a, hengte hi Adani Group firm tena offshore entities an thunun te an hman tangkai dan a ni tiin a sawi bawk.
February 16 khan Congress te chuan Prime Minister Narendra Modi laka Hum Adani ke Hain Kaun (Eng tiangin nge Adani nen kan inlaichin) series an tihchhuahah UAE a Vinod Adani kaihhnawih entity te chu Director of Revenue Intelligence te chuan Rs 5,500 crore scam a inhnamhnawihna an hmuchhuak an ti bawk a.
“Supreme Court ruat expert committee tena Adani Mega Scam an chhuichian mek kan nghah mek laiin, security regulation chungchangah te bakah judicial authority te an nei tawk lo thung a. Entir nan, Prime Minister Modi-an State Bank of India (SBI) te Adani Group hnena $ 1 billion puktir tura Gautam Adani leh SBI chairperson Arundhati Bhattacharya te nena meeting neihnaa ‘tihluihna’ te chu an chhui chiang dawn lo” tiin Ramesh chuan a sawi bawk.
“Hei bakah hian committee chuan Adani Group hnuaia unaccounted investment Rs 20,000 crore vel an hmuhna pawh chhuichian a ni dawn lo bawk a. Hei vang hian Opposition tena Joint Parliamantary Committee dina chhui chian India mipuite hnena thil nihna dik tak lailan hi kan tihmakmawhah kan ngai a ni,” tiin Ramesh chuan a sawi bawk.
Congress ten Modi zirtir ti
“Congress-in mi tin te a zirtir vek a, chung zingah chuan Prime Minister Narendra Modi pawh a tel” tiin party president Mallikarjun Kharge chuan Chikkodi ah a sawi.
Kharge chuan, “Prime Minister Narendra Modi hian kum 70 chhunga Congress thiltih a zawt reng a. A thlir kual a nih chuan kan party thil tih a hmu mai ang. Dam kan siam a, public sector undertaking kan kalpui a. Education, healthcare leh employment mi tin tan kan siam a. Kan ramin independence a hmuh khan literacy level chu 16% a ni a, tunah chuan 70% vel a ni tawh a. Tute nge ziak leh chhiar thiama mipuite siam tu? Doctors, engineers, scientists, teachers leh lawyers te zirtir thiamtu hi tu nge? Congress hian mi tin te a zir thiam tir a, chung zingah chuan Modi pawh a tel,” tiin a sawi bawk.
“Hetianga Modi a tawngna chhan hi phuba lak a duh vang a ni a. Congress nasa takin a hua a, a tumpui te zahngaihna tel hauh lovin a bei thin. Chintawk nei hauh lovin Congress MP Rahul Gandhi leh a chhungte chu a bei reng mai bawk a. BJP te chuan Rahul Gandhi chu a laka thubuaia thiam loh chantir a nih darkar 24 chhungin MP atangin an ban a, mahse, BJP MP ngei Gujarat mi Narayan Bhai Kachadia chu Dalit doctor kut a thlak avanga kum 3-1/2 lung in tantir tur chu MP atangin an ban ve duh lo thung,” tiin Kharge chuan a sawi bawk.