US based short-seller Hindenburg leh Gujarat based conglomerate Adani te cuan ‘India future tihkhawmuan’ tuma ‘awmzei nei taka India bei’ ah an inpuh tawn ve ve.
-- Advertisement --
January 29-a Hindenburg report an chhan letna phek 413 laia chhah an tihchhuah chu US short-seller te chuan chhang let zuiin, “Inbumna hi nationalism changchawia hliahkhuh tum chi a ni lo, puhna kan siam pawimawh te run dala chhan letna ang chauh a ni,” tiin an chhang let ve thung.
“Adani Group te hian an hausak chak em emna leh an Chairman, Gautam Adani hausakna hi India hlawhtlinna nen hmehbel an tum tlat a ni. Chu chu kan pawm ve lo va, keini chuan India hi vibrant democracy a nia superpower ni turin insiam mek hma lam hun êng tak nei a ni,” tiin an sawi a.
Hei bakah hian, “India hma lam hun hi Adani Group-in an chelh khawtlai zawk a, Indian flag-a intuamin awmze nei takin ram an rawk a ni,” an ti bawk.
Adani te insawifiahna leh thusawi te chhang letin Hindenburg Research te chuan Adani Group te hian ‘He issue pawimawh ber hi thlurbing duh miah lovin nationalist narrative ang zawka India mipui chawh thawh an tum daih zawk’ tiin an sawi bawk.
Pathianni zan tlai tawh takah khan Adani group te chuan Hindenburg te report chu ‘behchhan nei lo’ tia sawiin ‘rilru hrisel lo titih’ tih mai bakah ‘false market siam tum’ tia sawiin US firm tena financial gains an neih theih nana an hmalakna an tihsak a ni.
Adani Enterprise te hian Hindenburg te report boruak awm karah Rs 20,000 crore public offering an kalpui chuan beisei a pha lo hle a, Hindenburg report chuan an share nasa taka khawihin January 24 a Hindenburg Research tihchhuah a nih hnuah an share in tlakhniam lam a la pan ta char char a ni.
Adani Group te chuan, “He thil hi company pakhat beihna a ni lo va, awmze nei taka India beihna zawk a ni a, Indian sinstitution independence, integrity leh quality te, growth story leh ambition of India beihna a ni” tiin an sawi a.
Hei mai bakah hian “Hindenburg Research hian Indian judiciary leh regulatory framework te pawh remchang takin a haider a ni,” an ti bawk.
Mahse Adani te insawifiahna hi fim takin New York based short-seller te hian chhang letin an chhan letnaah Adani Group te hnenah zawhna 88 an zawt zui a. Adani Group te hian 88 zinga 62 chu an chhang thei lo an ti bawk a. Hei vang hian an zawhna te a mal mala chhan aiin an khaikhawm a, kaih her an tum a ni, an ti ve thung.
“A mal mala kan zawhna an chhan thenkhatte chuan kimchang taka kan hmuh dan kan sawi tawh a nemnghet zawk,” an ti bawk.
Hindenburg te chuan an zawhna thenkhat chhan loh te sawi nawn lehin Gautam Adani unaupa Vinod Adani nena inzawmna nei offshore entities zau zet mai te bakah heng offshore entities te leh Adani Group hnuaia company te sum inpek tawn dan te chu an tarlang bawk.
Zawhna an neih bulthut offshore entities te nena transaction an tih dana thil dik lo an sawi an puhna te chu Adani Group te hian chhanletna an siamah an hmaih lui daih an ti bawk a.
“Adani te hian Vinod Adani chu Adani Group nena inlaichinna nei lo tia sawiin, Adani Group entities te hmanga offshore shell entities te hnena US dollar billion te transaction tihnaah engmah thil buai leh dik lo a awm lo,” tiin Adani tena chhanletna an siam chuan a tarlang.
Public offer an bawhzuina lamah pawh Hindenburg te chuan thuchhuah siamin, “Tun hnaia Follow On Public Offcer (FPO) Adani Enterprise tena an kalpuiah pawh Mauritius funds tam tak SEBI regulation chiang taka kalh ngei a awm thu kan tarlang a ni” tiin Hindenburg te chuan an sawi bawk.
Pathianni khan Adani te chuan dan hmanga inkhinna pawh kalpui an tum zui thu an sawi a. “Hindenburg report a thil awm te leh puhna hrang hrang te chungchangah kan rights hmangin thuneitute hmaaah kan stakeholder te humhim nan hma kan la ang,” an ti zui bawk a.
Hindenburg te chuan Adani te chuan USA-ah legal suit an file duh a nih phawt chuan an ‘welcome’ em em tur thu an sawi zui thung a ni.