Adhoc ngiatin zirlaiten ke in Aizawl pan dawn

Thingsulthliah Higher Secondary School zirlaite chuan chief minister hnenah adhoc status-a an school dah ngenna lehkha thehlut turin vawiin, September 20 hian ke in Aizawl pan an tum.
Thingsulthliah HSS Students’ Union ruahman dan chuan, Nilaini zing dar 6.00 hian Thingsulthliah an chhuahsan anga, Tuikhurhlu ah tukthuan an ei ang. Airfield-ah chhung thingpui an in anga, chawhnu dar 3.00 velah Zemabawk Tawngtaina Mual thlen hman tumin, an kawng zawh tur hi km. 33 a thui a ni.
He school zirlai nu leh pa inhmukhawm chuan zirlaite hmalak tum dan hi an thlawp tih sawiin, a remchangten lirtheia zui an tum tih an lo sawi tawh a. Thingsulthliah Students’ Union pawhin long march neih tur hi an thlawp tih sawiin, ‘An zirlai kalsan meuha zirlaite hmalakna hi chief minister leh Education minister ten lo ngaihpawimawh sak a, vawi tam an lo tiam tawh hi tihhlawhtlin sak ngei turin kan phut a ni,’ tiin thuchhuah a siam.