Govt. Aizawl College-in adopted village leh school a thlan turah pilot survey bul tanna chu Nilaini khan Hmuifangah hman a ni.
-- Advertisement --
He hun hmanpuitu Tourism minister Robert Romawia Royte chuan khawvel ram changkang leh zirna in tha ten an lo tih thin anga Govt Aizawl College (GAC) in Hmuifang khawtlang tana ‘extended service’ an nei chu tha a tih thu a sawi a. Adopted village – Hmuifang khua leh GAC chuan thawhdunna thuthlung (MoU) an ziah angte a tihlawhtlingtu ni ve ve turin a duhsak tih a sawi.
College zirtirtute leh zirlaite Tourism minister a nih angin Mizoram chhung leh ram pawn atanga khualzinte lo lawm a, lo tawiawm thiam turin a ngen tih a sawi a. Kristianna leh Mizo hnam leh ram venhimna rilru pu chunga khualzinte dawngsawng thiam turin a chah. Midangte tana inpekna chu mahni nunah a lo let leh thin tih sawiin, GAC-in midangte tana an inpekna chuan college-ah rah tha a chhuah ngei a beisei tih a sawi bawk.
GAC vice principal Lalbiakzuala sawi danin, an college hian kum 2019 atang khan adopted village atan Hmuifang khua an thlang a, a tum hnihna atan MoU an ziak tawh a ni. Hmuifang khawtlangin kawng hrang hranga hma an sawn theihna atana thlan an nih chhan tlangpui a sawi a; GAC-a department 9-in a theih ang angin hma an lakpui dawn bakah Hmuifang khaw mi GAC-a zir chu a thlawna admission pek an ni a, kum khatah a thlawna inentirna tum hnih neih tum a ni.
Hemi hnu hian GAC-a teaching staff, non-teaching staff, zirlaite leh Hmuifanga NGO-ten hmunhma thianfaiin an hnatlang a ni.