AFC in Lajong an sawp

AFC in Lajong an sawp
Pathianni tlaia Indian I League khelhah Aizawl FC an chetha chhunzawm a, hmarchhaka an elpui lian Shillong Lajong chu si thum faia sawpin, pahnihnaah an inhlangkai. AFC tan Lalrinzuala a chetha chhunzawm zel a, goal a thun belh zel.
Hmarchhak atanga I League champion hmasa ber Aizawl FC hi an lenluhna SSA Stadium, Shillong-ah bul an tan tha hle a, inkhel tan atanga minute lina lekah goal an thun nghal. The People’s club tan hian season kal meka goal thun thei tak, goal thun thulh hleithei lo Lalrinzuala chuan hmahruaina goal a thun. Rinzuala hian season kal mekah khelh 9 atangin goal 9 a thun tling der tawh a, Gokulam Kerala FC forward Alejandro Sanchez nen topscorer an ni dun mek.
Rinzuala goal thun hnuin AFC an khel tha chhunzawm a, goal an thun belh leh thuai. Minute 17-na lekah R Ramdinthara chuan an goal hnihna thunin an hmahruaina a ti zau a. An goal hnuhnung ber hi minute 57-naah Joe Zoherliana thun a ni ve thung. Zohera goal luh hnuin goal dang a luh belh tawh lo va, Aizawl FC in hnehna lian an chang nawn leh.
I League champion hlui Aizawl FC hian Ningani tlai khan 5-1 ngawtin TRAU FC an lo sawp tawh a. Ni hnih hnu lekah hmarchhak team dang Shillong Lajong an sawp zui leh a, an che tha tluang hle. Pathianni tlaia an hnehna hmangin The People’s club hian khelh 9 atangin point 17 an hmu a, pahnihnaah an inhlangkai. An chunga awm Lajong hneha point thum an hmuh vang hian pangana atangin pahnihnaah an insawn dawrh a, hmahruaitu Mohamedan SC nen an inkarah point thum a tla zep mek a. AFC hian vawi khatin an khel tam zawk mek thung.