Agra airport in bomb hmanga vauna dawng

Thawhtanni zing lam khan Agra airport chuan bomb hmanga vauna dawngin, security tih khauh lehzual nghal a ni a, finfiah a nih hnuah inbumna thil mai a ni tih an hmuchhuak.
Agra airport hian email dawngin, bathroom-ah bomb dah a nih thu an dawng a, rang takin bomb sut thiamte tirh nghal a ni, tiin assistant commissioner of police (Lohamandi) Mayank Tiwari chuan a sawi.
Agra airport director Yogendra Singh Tomar chuan email an dawn hnuah airport chu darkar hnih chuang zet uluk lehzuala dap a nih thu a sawi a, engmah rinhlelh tur a awm zui tak loh thu sawiin, inbumna thil mai nia a lan thu a sawi zui.
December 3 pawh khan Uttar Pradesh tourism chuan Agra-a awm Taj Mahal chu bomb hmanga beih a nih tur thu a lo dawng a, fimkhur taka an chhuizui hnuah engmah rinhlelh tur an hmu zui lo tawh bawk a ni.