AH&Vety Bana Kaih scheme pilot phase atan mi 67 thlang

AH&Vety Bana Kaih scheme
pilot phase atan mi 67 thlang
Sawrkar flagship programme ‘Hand Holding Scheme’ hnuaia AH & Vety department kaltlanga pilot phase atan diltu engemawzat atangin mi 67 thlan an ni a, vawk vulh diltu an tam ber.
An department bika Bana Kaih scheme pilot phase hmalakna hi Nilaini khan AH & Vety minister C Lalsawivunga kaihhruaiin sawiho a ni a. AH & Vety special secretary Ajit Roy leh director Dr R Zothanmawii bakah hand holding scheme buaipuitu official-te an tel.
AH & Vety Hand Holding Scheme nodal officer Dr Robert Rualthankhuma chuan hamthatna dawngtu (progress partner) thlan kawnga Search Team zirchianna report a pe a. He scheme kalpui kawnga pawimawh sawiho a ni.
Pilot phase atana district hrang hranga hand holding scheme hnuaia tanpuina diltu District AH & Vety officer-ten an thlan chhuah chu November 5-8 chhung khan hmun thumah inthenin Search Team hian an kalchilh a, an farm dinhmun enpuiin an titipui a ni.
AH & Vety department hnuaia hand holding scheme pilot phase atan diltu engemawzat zingah mi 67 – ar vulh 19, kel vulh 8, vawk vulh 30, bawng vulh 6, ran chaw siamna 2 bakah sa leh bawnghnute sawngbawlna lam siam diltu 2 thlanchhuah an ni a, hemi atana loan senso ngai tur zat chu cheng nuai 1700 chuang a ni. Pilot phase atana thlan chhuah hi Planning & Programme Implementation department-ah Apex Body-in an enfel leh tura thehluh a ni ang.