AI-in Nepal thlawh thulh, PM hovin CSS-in buaina sawiho

hovin CSS-in buaina sawiho
Nepal rama mipui thinrimna sosang tak avanga an ram buaina chhuak avangin Air India chuan Thawhlehni khan Delhi–Kathmandu–Delhi thlawk tur an thlawhna pali chu an thulhtir a. Hetih lai hian Cabinet Committee on Security (CCS) pawh Prime Minister Narendra Modi-a hovin Delhi-ah buaina sawiho hian an thu bawk.
India thenawmah hian mipuiin social media khapna duh lohna leh ei rukna nasa duh loh lantir nan lungawi lohna an lantir a, Thawhlehni kha a ni hnihna a ni.
Buaina hmeh mih nan khapna hlih a ni a, Prime Minister KP Oli-a a bâng bawk a; mahse, Nilengin buaina a reh lo va, parliament luhchilhin hal a ni a. Politics hruaitu eng emaw zat chenna pawh hal a ni.
Thawhtannia police-in an nawr letnaah mi 19 an thih hnuah Thawhlehniah mi pathum an thi leh nia sawi a ni bawk.
Nepali Army chuan Kathmandu-a Tribhuvan International Airport a him theih nan an veng a, thlawhna lut leh chhuak erawh a awm lo va, khar a ni.
IndiGo pawhin India atanga an thlawh vek tawh hnuah an thlawhna an ko kir leh bawk.
A thenawma mipui thinrimna nasa tak awm mek ngaihtuah hian Prime Minister Modi-a chuan Delhi-ah CCS thutkhawm kovin an sawi ho va. Committee hi India-a venhimna thila thutlukna siamtu sang ber a ni a. Member zingah home, defence, finance leh external affairs minister an tel a. National Security Advisor (NSA) chu secretary a ni thung.
Modi-a chuan Nepal mipuite chu inbengdai turin a ngen a. Nepal himna, muanna leh nghehna chu India tana pawimawh tak a nih thu leh India-in chu chu a duh ber a nih thu a sawi.
Prime minister chuan, “Himachal Pradesh leh Punjab ka tlawh hnuah vawiin khan CCS thukhawmin Nepal-a thil thleng kan sawiho va. Tharum thawhna thleng hi pawi ka ti a, thalai tam tak an thi pawh pawi ka ti tak zet a ni,” tiin X-ah a tar lang.
Sorkar chuan Nepal-a thil thleng hi uluk takin a thlithlai reng tih a sawi.