Dan lova India-a luh thei nana thil ti thinte hai chhuak

Assam Police-ten beihpui an thlakna lian takah Guwahati-a Dispur-ah Bangladesh mi pali an man a, an zingah kumtlinglo pawh a tel a, dan lova ramri kânna tura thil ti thinte chet dan an hai chhuak.
Thu an dawn bawhzuiin Police Commissionerate-a Border Branch chuan lehkha pawimawh tul ang nei kim lova India-a lut nia sawite chu an man a ni.
Bangladesh-a thawn let an nih theihna tura dan anga hma lak mek a ni a, Dispur Police Station-ah an hreng mek.
An chhui chiannaah chuan police-te chuan dan lovin ramri hi Zirtawpni khan anmahni hruaitute (broker)-ten puiin hna zawngin an kân a, Inrinni khan Guwahati an thleng a ni.
Police-in hma an lak zuinaah ramri an kân theih nana puitu leh ruahmanna siampuitu, taxi-pu, Md Akkash Ali-a an man zui bawk.
Dispur Police Station-ah anmahni puitu hi Bharatiya Nyaya Sanhita (BNS) section hrang hrang – Section 21(2), 45, 318(4), 336(2), 340(2), leh 112(2) – bakah Immigration & Foreigners Act, 2025 Section 24 hnuaiah thubuai siamsak a ni.
Police thuneitute chuan ramri kaltlanga dan lova inrawlh leh mihring hralhna lama inhnamhnawih inzawm zawk hmuhchhuah a nih theih nan chhui chian belh zel a nih thu an sawi.