Aibawk Mini-Sports Complex hawng

Aibawk Mini-Sports Complex hawng
Cheng nuai 400 senga Aibawk Mini-Sports Complex sak chu Zirtawpni khan Rural Development minister Lalruatkima chuan a hawng. He hunah hian a enkawl tura ruat Management Committee hnena hlan nghal a ni.
RD minister chuan Aibawk leh a chhehvel khua tih hmasawnna tura Rural Development-in tan a lak nasat zia sawiin, an hmalakna ten rah tha a chhuah zel thin chu lawmawm a tih thu a sawi. Infiammiten tangkai taka an hman a, hlawhtlinna an neih theihna’n rah ka pawimawh tak nise a duh thu sawiin, nu leh pate pawh an fate zingah infiamna lama tui an awm chuan phurpui turin a chah bawk.
Aibawk RD Block chu India ram puma RURBAN cluster zingah RURBAN project zo fel hmasa ber leh thawk tha ber a ni tih Lalruatkima hian a sawi a. Project hnuaia item 48 a hun taka zawhfel a ni chuan hmasawnna pawh nasa takin a thlen a ni, tiin, sawrkar laipui atanga endiktu rawn kalten lawmawm an ti a, Ministry of Rural Development pawhin a fak tih a sawi a ni.
Aibawk Mini-Sports Complex hi DoNER ministry hnuaia NLCPR kaltlanga khelmual project pali zinga pakhat a ni a, he project atana a tira sum ruahman cheng nuai 413-ah nuai 13 chu DoNER-in lo cut in, 2017 May 5 khan nuai 400 sanction a ni. A sakna tur tender hi 2017 October 26-a tih chhuah niin, 2018 February 5-ah NECS hnenah hna pek a ni a. Work order pek atanga kum 2 chhunga sak zawh tur a nih laiin, Covid-19 leng vangin hun tiam chhunga zawh a ni loa, sawrkarah tum thum ngawt hun pawhsei dil a nih hnu in 2022 March 31-ah a hna lian zofel anga ngaih a ni a. A tihchangtlunna atan contractor hian hna a thawh chhunzawm zel a ni.
Project tan tirhah hian a hmunhma neih sa in standard size a phak loh em avangin PWD leh School Education department ten an ram an pek belh a, tlak dalna (fencing) thui tak DPR ah hian telh niin, DPR-a tel lo thil chi hrang hrang – ball tlak dalna, fencing, approach stone masonry step, side drain adt siam belh a ni bawk.
Mini Sports Complex-ah hian Contact Sports Centre lian tha tak sak a nih bakah Aibawk Playground awm sa chu standard size tlinga laih zau a ni a, gallery leh pavillion sak tel a ni.