AIDS: Kan hmelhriat, kan hneh theih a ni

Lalremsiama
Thakthing veng
A hun zawnga ngaihtuah dawn chuan a rei ve ta phian; mi ramah chauh thleng turin mi tam tak chuan kan dah maithei, mahsela kum tam tak kan lo hmelhriat ve tawh hun engemaw lai atanga sorkar pawhin a buaipuitu tur a hranpa liau liaua a dah hial, HIV/AIDS hi engtikah tak kan buaipui a tul tawh loh ni hi inher chhuak tak ang maw? A va nghahhlelhawm tak em! Hunin a la her chhuahpui mai turah ngai ila, mahsela hemi hun thleng tur hian tih tur tam tak a awm ngei mai; chungte chu kan lo tih ve a ngai. HIV/AIDS vei kan tih mai te hi kum engemaw lai kha chuan kan endawng a, kan thinhrik a, kan hlau bawk thin; mahsela, kan la hriatchian loh vang te pawh a nihna chen a awm ang e. Mi khawngaihthlak tak, mi vanduai an nih rualin, HIV/AIDS vei te hi a tlangpui thuin ruihtheih thila fihlim lo an nih deuh thin bakah, damdawi hmanga inchiu thin te an ni tlangpui a (vanduai avanga vei an awm ve zeuh zeuh). Hetiang mite hian an sim theih tawh si loh chuan anmahni enkawl dan tur tal ngaihtuah a lo ngai ta a, chu chu sorkarin a kalpui ta zel a ni.
Ruihhlo ngaite enkawlna tur mithiam zawkten ruahmanna an siam thenkhat zingah Opiod Substitution Therapy (OST) hi a pawimawh khawp mai. Hei hi ruihhloa injection thin te, injection tawh loa an awm theihna tur leh an chakna tireh tura enkawlna a ni ber a, hemi hmang hian mi tam tak enkawl dam an lo ni tawh a, zawngchhangthlak tak a ni.
Hei hian, ruihhlo an châkna kha nasa takin a tihniam thin a, chumi a niha an chakna tam tak a bo miau chuan an tan nghei a lo awlsam phah deuh thin, a ngheina erawh a ni lo, mahsela a nghei duhte nasa takin a pui thei thung. Mithiam zawkte ruahman anga an kalpuia anmahniah tumruhna a awm tlat chuan, ruihhlo bawih atang hian an tal chhuak chawk a nia.
Zu in thin te zingah zu ngawlvei kan tih te pawh hi tam tak te chu zu bawih atang hian an tal chhuak zo lova, an thihpui tam tawh viau. Mi chinchang hria te chuan zuin a bawih tawhte aiin ruihhloin a tihbuaite hian tal chhuah an harsat zawk a, ruihhlo an tihna ber injection a nih tlat avangin syringe an lo inhman tawm thin bawk nen, natna inkaichhawn a lo awlsam bik em em a ni, an ti thin. Chumi a nih avang chuan natna inkaichhawn venna kawng khat atan syringe-te pawh sem a nih thin tak hi.
Eng pawh ni se, AIDS natnain a tihbuaite hi ruihtheih thila fihlim lo an nih tlangpui avangin ruihtheih thil an nghei phawt hi a pawimawh; chumi rual chuan inenkawl dan te a awm zel a, damdawi in hrang hrangah te a buaipuitute rawn theihin an awm reng a, tunlai takin QR code te pawh ruahman a ni.
Kan Pathian thu chuan, miin a do zawh loh tur khawp thlemna an chungah a thleng ngai lo, thlemna an tawh rualin tlanchhuahna kawng a buatsaih nghal thin, tih thu min hrilh a. Chutiang deuh chuan, kan thanmawh bawk pakhat AIDS pawh hi kan do zawh loh a ni lova, mahsela he natna laka tlanchhuahna kawng an lo buatsaih hi kan hmuh hmaih ta thin a ni zawk. A kawng dik tak hi hmuh fuh tum ila chuan a hla hauh lo a nia; min tanpui turin MSACS a inpeih reng bawk si.