AIFF-in India coach nih tum Guardiola leh Xavi dilna a hnawl?!

AIFF-in India coach nih tum Guardiola leh Xavi dilna a hnawl?!
Tunlai hian Spanish coach Manolo Marquez-a kalsan hmunruak luaha India mipa football team head coach thar tur thlanna boruak a kal chho mek a, All India Football Federation (AIFF) hnuaia Technical Committee pawhin executive committee thlan turin dilna lut zinga pathumte chu a thawn fel tawh a, Aizawl FC boss hlui Khalid Jamil-a’n rin a kai ber mek karah chanchin bengverh tak a richhuak a, Blue Tigers enkawl tura dilna (application) thehlut zingah Spaniard coach lar pahnih Xavi Hernandez leh Pep Guardiola-te an lo tel reng niawmin media lamin an tarlang!
Application lut tha hnem tak atangin Technical Committee chuan mi 10 a thlang phawt a, chuta tangin candidate pathumah an sawrzim leh a, tah hian Jamil telin India head coach hlui Stephen Constantine leh Slovakia mi Stefan Tarkovic-te chu khalhfal an ni a, an pathum atang hian buk a ni dawn a; mahse, chanchin mak angreng tak rawn richhuak ta lam hi Indian football ngaihventute hriatchian chak a ni mek.
Press Trust of India tarlan danin, AIFF top official pakhat chuan World Cup-winning Spanish great Xavi Hernandez kha India football coach position luah tura dilna thehlut zingah a tel tih a sawichhuak a, he thu a sawi atanga ni khat hnuah All India Football Federation chuan thuchhuah siam ve nghalin, e-mail kaltlanga dilna an dawnah felhlel awmin, Xavi Hernandez-a hming chu a rintlak (genuine) tawk lo niin an sawi a, shortlist-ah mi pathum hming an tarchhuak zui ta a ni.
AIFF thuchhuah chuan, “Spanish coach pahnih Pep Guardiola leh Xavi Hernandez-te hminga dilna chu e-mail kaltlangin kan dawng ngei a, mahse, anmahni tak tak a ni ngei em tih kan nemnghet thei lo a, chuvangin, kan e-mail dawna ‘application’ pahnihte hi a genuine tawk loa ngaiin kan ziaklut ta lo a ni,” an ti.
Hming tarlante hi anmahni tak tak dilna a ni reng em tih zawhna a pian mek laiin AIFF official pakhat chuan karliamta Zirtawpni khan Xavi ‘application’ an ngaihtuah loh chhan chu Barca legend meuh ruai turin AIFF lamin ‘resource’ an nei lo tih a sawi a, Xavi rawih chu an tlin lo tihna a ni!
Khawvela football coach ropui zinga lang pha Guardiola pawh ni ta tehreng se AIFF rawih phak ni chuang lo tura ngaih a ni a, hei vang hian an dilna hi rintlak tawk loah an chhuah mai mai a ni thei ang em?!
India international hlui IM Vijayan-a kaihhruai Technical Committee lamin shortlist candidate-a an telh pakhat Englishman Constantine khan tunhmain tum hnih India team a lo enkawl tawh a; chutih laiin, Slovak Tarkovic hian 2020 Euro Championship lai khan Bayern Munich legend Robert Lewandowski khelhna Poland lakah Slovakia a chakpui a, kha kha fak a hlawhna pakhat a ni.
Vijayan hian executive committee thlanchhuah tura candidate pathum an thlanchhuah chungchang sawi chungin shortlist-a lang ve ta lo international coach tling hliah hliah dangte pawh hun lo kal zel tur atan an rilru atangin an paihbo nghal tihna a ni lo tih a sawi.
India captain hlui ve bawk, National Team Director ni chho ta Subrata Paul pawhin shortlist candidate pathum an thlan dan boruak sawiin, “Tun hi Indian football tana hun pawimawh lutuk a ni; Coach kan rawih turte chu technical lama rintlak an nih piahlamah Indian leh Asian football style man pha, he ram leh khawmualpui nunphung leh hawiher leh danglam bikna pawh hrethiam an nih a ngai a, chuti ang tak coach kan rawih fuh theih chuan kan player-te nen pawh rang takin an inpawh thei ang a, insuihzawm nghal turin hun a duh rei lo ang,” a ti.
AIFF hnuaia technical lam mi pawimawhte thlirna atang hi chuan Spain lam lama an coach ropuite nena inzawmna neih chu an ti vak lote pawh a ni thei mai ang em?!
Kum 45-na hmang mek Xavi Hernandez hian FC Barcelona thuam a inbel chhung khan La Liga title panga, Copa del Rey trophy pathum leh UEFA Champions League trophy pathum bawk a la tling a; an sawi angin, India head coach ni tura dilna thehlut zingah hian a tel tak tak a nih chuan Indian football tan pawh phurna thlentu a nih ve ngei hmel!
Xavi leh Guardiola hminga dilna lut an tih hi anmahni ngei a ni tak tak em ni lo em tih keini tan hriat phak a ni lo a; an sawi ang hian an lo ni tak tak ang a, AIFF hian anni ang top coach rawihna tur sum a neih loh avangin shortlist hmasa 10 an thlanchhuah zingah pawh an telh ngam ta lo a ni mai ang em?!