Makhmudov tukdawl hnua Joshua lam hawi leh nghal Fury

Inrinni zan khan London khuaa Tottenham Hotspur Stadium-ah British heavyweight world champion hlui Tyson Fury chuan unanimous decision-in Russian fighter Arslanbek Makhmudov a hneh a; he bout zawh rual hian thang khat lian zet thawm a awm tawh chunga a la hmachhawn theih loh a chipui Anthony Joshua nena inhnek boruak a lian zui leh nghal hluai!
Fury leh Joshua intawng tur hi ‘Battle of Britain’ boxing match tia sawi hot a nihna a rei tawh a, professional boxing an chawlhsan hnua hruihrual chhunga an kir nawn awn awn hnu thlengin chu beiseina chu a takah a la chang zo lo a, tun tum erawh ‘chance’ hnuhnung lam a nih tawh avang leh sum siamna atan pawh an pahniha tan hei tluka tha hi a awm lo ang tih tur a nih avangin a puitlin chhoh tawh mai a rinawm!
Makhmudov dahthat zawh interview-ah Fury hian a taka ‘Battle of Britain’ thlentir turin Anthony Joshua a cho nghal siah a; mihang fighter pawhin chhanglet ve nghalin, Fury chu kum 10 chuang lai a lo um tawh thu leh amah lam a inpeihchhuah hun huna Fury chu a hmachhawn nghal tur thu sawiin, Britain mipui mai ni lo heavyweight khawvelin a nghahhlelh thlentir tura inbiakna pawh kalpui dan kawng dap nghal a duh thu thlengin a sawi!
Tun kha October 2024-a Oleksandr Usyk a hneh loh hnua ring chhunga Tyson Fury luh leh vawi khatna niin, Russian a tukdawl lai kha a hmun ngeiah Joshua pawhin a thlirliam a; British fighter palian pahnih hi an intawng nge ngein a rinawm ta telh telh!