Champion thar Carlos Ulberg

On Apr 13, 2026 7 0

Pathianni zing khan Miami khawpuiah UFC 327 neih a ni a, kawnghren inchuhna fight ngaihven hlawh takah Carlos Ulberg chuan champion tura rinkai zawk Jiri Prochazka chu awlsam takin a hneh a, light-heavyweight champion thar a ni.
Light-heavyweight huanga champion lai Alex Pereira chu palian huangah a insawn a, June ni 14-a neih tur White House a UFC neih hunah a inlan dawn. Palian huangah Pareira a insawn vangin light-weight huangah champion thar zawn a ngai a, kawnghren inchuh turin No. 2 Jiri Prochazka leh No. 3 Carlos Ulberg te thlan an ni.
Kawnghren inchuhnaah hian fighter hriat hlawh tak Prochazka chu champion tura rinkai zawk a ni a, Ulberg lakah awlsam taka a chak rin a ni nghe nghe. Champion tura rinkai leh tan hlawh Prochazka hian bul a tan tha a, ngam takin a khingpui a nawr nghal. A khingpui a petna lamah Ulberg hian a ke lamah hliam a nei nghal nghe nghe a, Prochazka tan chak theihna hun tha leh zual zawk a awm. Awl sam taka chak a tum luat leh a khingpui a ngam luatah a chesual ta thung. Ulberg hian fuh zetin a lo hnek a, ngam taka nawrtu hi a hnek tlu. Thawhchhuah leh tum viau mah se Prochazka a thochhuak thei lova, round khatnaah uiawm taka tlawmin, kawnghren a hlawhchhuak zo leh ta lo a ni.
Light-weight huanga champion hlui Jiri Prochazka hian UFC-ah fight vawi 39 hmachhawn tawhin vawi 32 a chak tawh a, fighter huaisen tak niin a khingpui mi 28 lai a knockout. Champion a nih hnuin Alex Pareira arawn lang a, a kawnghren a hloh bakah lak let leh tum thin bawk mah se a la let thei tawh lo. Pareira awm loh hnuin kawnghren lak let leh theihna hun tha nei bawk mah se a chesual a, Ulberg lakah tlawmin kawnghren a la thei ra rih lo.
Rinkai lo zawk ni chunga champion thar ni ta Carlos Ulberg kha fighter thangduang tak niin, UFC-ah fight vawi 15 hmachhawn tawhin vawi 14 a chak a, vawi khat chiah tlawm zawkah a la tang. Fighter hriat hlawh tak Prochazka hnehin light-heavyweight champion a ni ta hial a ni. A hliam kha engtiang taka na nge a nih hriat chian a la nih loh thu UFC President Dana White chuan a sawi a. A lam leh thuai an beisei thu a sawi tel bawk.
Iran nen indo mek ni mah se US President Donald Trump chuan UFC 327 hi a hmunah a en a. President in UFC a en lai hian Vice President JC Vance chu Iran nen inbiakna nei turin Pakistan lama a fehchhuah ve daih thung.