Lengpui Airport-a hnathawktuten an hmanraw phurh nana an hman avangin airport-a trolley engemawzat chhiat bakah an indaih lo hle tih National Student’s Union of India (NSUI) chuan an sawi a. Airport cheithatu contractor chu a tira trolley awm zat a thar a dah thuai loh chuan a tul angin hma an la dawn tih an sawi.
-- Advertisement --
NSUI Mizoram State hruaitute chuan Thawhtanni khan Lengpui Airport tlawhin trolley hman tlak awm mang lo nia sawi chu an enfiah a. GAD Aviation Wing-a an hotute kawmin mipui mamawh trolley indaih lohna nasa lutuk leh zin vei vak bungraw ngah tak tak ten harsatna an tawk tih an hria in an enfiah a, trolley chhia tam tak an hmuh bakah a hmantlak 25 chauh a awm tih an hmuh thu an sawi.
Lengpui Airport cheithat mekah a ban khuhna bungraw tha ber chi Armstrong company hman tur a awm reng laiin, a chhe chi Alstrong company hman a awm nia an hriat thu an sawi bawk.
Lengpui Airport-a trolley indaih hman tur a awm loh chhan leh a chhiat chhan chu, airport cheithat hna thawktuten cement leh an hnathawhna hmanraw rit tak tak nawrna atan an hmang thin tih NSUI (Mz) president RB Lalmalsawma chuan a sawi a. Congress sawrkar vanga Lengpui Airport din a nih tirhin arrival leh departure atan trolley indaih a awm a, 300 atanga 400 inkar vel a awm tih a sawi
“Mipui hman tur indaih awm lo khawpa contractor Kamrula ten trolley an hmang chhia hi kan hrethiam loa, a tichhetu contractor hian ni 15 chhungin a tira awm zat vel trolley thar an dah ngei tur a ni. Hun tiam chhunga an ti duh lo a nih chuan hma kan la dawn a. Contractor-te chungah engpawh thleng se sawi buai theih a ni loang,” a ti.
NSUI president chuan mahni pumpui hmangaih lutuk avanga work order awm hma in hna tan tir a nih thu te, a sak that loh em avanga a sak laia chim Lengpui Airport chu MNF sawrkar chuan hei bak hi tih chhiat belh tawh lo se an duh thu leh, a changtlunna kawnga theihtawpa hma la ve zawk tura an ngen thu te a sawi a ni.