Sawrkar laipuiin gas connection la neilote tan a thlawna connection pekna tur a ruahman chu Mizoramah bawhzui a hlawh tha loa, bawhzui tha lo gas agency/ dealer-te chu central lamin ti tura an tih angin an report dawn tih BJP Mizoram chuan an sawi.
-- Advertisement --
Thawhtannia BJP State office-a inkhawmah party state president Vanlalhmuaka chuan Mizoramah eirawngbawlna gas la neiloten an neih theihna turin PM Modi-a’n dealer-te kaltlangin a thlawnin gas connection a pe chhuak a, BJP sawrkarna state-ah chuan free gas connection mamawhtute pek kim an nih chhoh mek laiin Mizoramah erawh IOC leh gas dealer thenkhatin PM Ujjwala Scheme chu a nih ang tura kalpui loin an ngaihsak tha lo niin a sawi.
PM Scheme a nih dan tura kalpui tha duhlo gas dealer-te chu ministry-in hma a lak theih na’n report tura an tih angin kumin January thla ralhmain report an thehlut dawn a, PM Scheme ngaihpawimawh loh avanga tuar an lo awm a nih chuan dealer-te thiam loh a ni dawn tih a sawi.
India ramah PM Modi kaihhruai sawrkar a din atangin retheihna lak ata miretheite tan thawvenna a thleng mek a, BJP sawrkarna state-ah chuan PM Scheme kaltlangin economic freedom (retheihna atanga zalenna) a thleng a, party induhsak bikna leh mihausate leh miretheite inkar zau lutuk chu a bo mek tih Vanlalhmuaka hian a sawi bawk.
Mizoramah BJP a hlauhawm thu kan insawithaih laiin, thenawm state, a bikin Kristian tamna state – Nagaland, Meghalaya, Manipur, Arunachal Pradesh ah te pawh BJP an sawrkar a, Mizo Kristianten heng state atang hian BJP a hlauhawm leh hlauhawm loh chu kan hmu thei tih BJP Mizoram president hian a sawi.
“Heng state-ah hian PM Schme-te chu a takin an kalpui a, miretheiten thawvenna an chang a, keini ramah erawh a fatuten miretheite chanai an ei zawh avangin harsa takin kan la awm a ni. 2023 MLA inthlanah hian Mizoramah miretheite tan thawvenna a thlen theih nan, hmasawnna dik, sawrkar tha kan neih theih nan BJP sawrkar kan mamawh a ni,” a ti.