Airport inrelbawlna chhui phut

Lengpui Airport inrelbawlna chungchanga inhnialna awm chu chhuichiang turin thuneitute an phut tih PC party chuan an sawi.
PC Gen. Hqrs. thuchhuak chuan, Mizoramin thlawhna tumhmun a neih ve theih nana Lengpui ram, tuna Airport ni ta chu Brig. T Sailo chief minister nih laia a sualchhuah, Congress leh PC sawrkar intawm laia tihpuitlinna tura ruahman fel ni ta, chumi hnua Congress ministry-in a tihpuitlin tak a ni, tiin, ‘Lengpui Airport inrelbawlna chungchanga tunhnaia Congress leh MNF party ten Assembly House thlenga inbeih phah nana an hmanna hi mipuiin thudik tak kan hriat theihna’n a rang thei ang bera chhuichiang turin thuneitute kan ngen a ni,’ a ti.
PC ministry-in hun khirh tak leh harsatna tam tak kara Mizoramin Lengpui rama thlawhna tumhmun neih theihna tura theihtawp a lo chhuahna in rah duhawm tak a neih lai a, mimal sum siamna’n leh mahni party hamthatna tur ni awm takin Lengpui Airport-in pawngsual a tawk ta chiam mai tih PC party hian sawiin, mualphothlak a tih thu a sawi a. Lengpui Airport chuan a nihna tur dik tak a dinchhuahpui theihna turin uluk taka enkawl a, tiphuisui deuh deuh turin Mizoram sawrkar an beisei tih a sawi.