Bill pass duh loah ruling puh

Assembly House-a eptu member Dr Vanlalthlana private bill putluh chu pass pui duh loah ZPM chuan ruling MLA te puhin, mipui hma ngai lo nia an hriat thu an sawi.
ZPM Gen. Hqrs. thuchhuak chuan, Assembly Budget Session neih mekah ZPM Legislature Party secretary Dr Vanlalthlana private bill putluh, ‘The Mizoram Land Revenue (Amendment) Bill 2023’ chu sawi ho a nih hnuah Assembly Select Committee-in a tul anga a bawhzui tura dah a ni tih a sawi a. Nikum Budget Session-ah Dr Vanlalthlana hian Mizoram Assembly din hnua private member bill pathumna ni turin ‘The Mizoram Private Transport Workers (Welfare) Bill 2022’ a pulut tawh bawk tih sawiin, eptu member ni chunga a kum zawna private bill pulut thei khawpa a taimakna a fakawmin an chhuang takzet tih a sawi.
Eptu member bill a nih avanga rorel laiten an pass pui duh lo anga lang chu pawi a tih thu ZPM hian sawiin, ‘Ram hmasawnna tur bill pawimawh tak tak pahnih a kum zawna pass loh a ni hian ram tana legislator thahnemngaite inpekna a ti pamhmai hle a. Heng bill pass a nih loh na’na dangtu rorel mek party-te hian mipui hma an ngai tak tak lo niin a hriat bakah kan sawrkar hrawn meka rorel laiten eptute an enhranna nasa lutuk a tilang chiang hle niin kan ngai,’ a ti.
Budget Session neih mek chu mipuiin uluk taka an thlir thu te, House member zingah sawihona pawimawh a awm laia nungchang mawi lo, tawngkam chaltlai tak tak, eptu member-te elsenna, thu pawimawh sawiho laia fiamthu nena khawsak ching member thenkhat an awm tih sawiin, hei hian House a tizahawmlo tih a sawi. ‘A bikin hetiang tih chingte hi rorel lai member-te atangin a ni lehzual a. Legislator nungchang mawi lo tak takte hian kan ram rorelna in sang ber an tizahawm loh a, ching chhunzawm tawh lo tur leh ram leh hnam tana ngaihtuahna tak tak seng turin kan ngen a ni,’ thuchhuah chuan a ti.