Airport trolley chhia kaihhnawihin House chhung leh pawn nghawng

Lengpui Airport-a trolley chhia leh a chhia thlak tura phutna chuan Zirtawpni khan House chhungah leh House pawnah nghawng a nei a. House-a inhnialna tenau a chhuak a, Session kal lai a buai lohna turin House chhehvelah harsatna awm thei vengin police thahnem tak an duty bawk. Hetihlai hian GAD (Aviation) chuan hnathawh nana trolley hmangtute hrem an nih tur thu thupek a tichhuak.
Airport-a trolley chhiat chhana mawhphurtua puh airport cheithat hna thawktu contractor chu a chhia thlak turin Congress party chuan an phut mek a. Zirtawpnia Congress Bhavan inkhawm zawhah Assembly House lamah an thil phut nawrna pakhat atan punkhawm tum nia hria in, dan leh thupek kenkawh tumin magistrate leh police thahnem tak an duty a ni.
Hemi chungchangah hian MPCC chuan thuchhuah siamin, February 17 khan Govt. J. Thankima College chuan NAAC accreditation A+ an hmuh lawmna Vanapa Hall-a an neih turah chief minister Pu Zoramthanga’n a hmanpui dawn tih College thuneituten MPCC president Pu Lalsawta hnenah February 16 zan khan an hrilh a, an programme neih tura ruahman lawkte tibuai lo turin an ngen a. He ngenna hi a zahawm avangin, MPCC Action Committee-in programme siam tura ruahmanna an neih chu College programme tibuai thei turin chief minister an dang dawn lo tih a lo hrilh a. MPCC president sawi angin kar tin Zirtawpnia Congress Bhavan-a political session neih thin bak programme dang an siam loa, khawi hmunah mah mipui chevel tibuai turin Congress party-in programme a siam lo tih a sawi a ni.
‘J. Thankima College-in grade sang zawk an nei hi kan lawmpui em em a, a lawmna programme pawh tluang taka an neih theih nan duhsakna kan hlan a. Hetih laia chief minister berin dawt hmanga Congress-in an dan avanga programme neih turah a kal thei lo anga a sawi hi dawta inpuh hmingchhiatna a ni a, a lawmawm loh hle,’ MPCC thuchhuah chuan a ti.
Hetihlai hian Zirtawpnia Assembly Session-ah MNF member Lalrintluanga Sailo chuan airport trolley-te Congress party-in lachhuaka Vanapa Hall hnuaia an chhawp chu dan lo leh tihchhiat chawp niin a sawi, tiin, Congress party hotute chuan chawhnu lamah House pawna magistrate leh police hotute an bia a, House chhungah member-in dawt a sawi a, ngaihdam a dil tur a ni, tiin ngaihdam a dil an phut tih an sawi. Hei hi a ti lo a nih chuan an party member thinrim an bengdai zawh loh an hlau tih magistrate kaltlang hian an hrilh a ni.
Hetihlai hian MNF Gen. Hqrs. thuchhuak chuan airport passenger trolley chungchanga politics inbeihna a chhuak chu pawi a tih thu sawiin, he thil hi zirchian a nih thu a sawi a. 2022 October 20 khan GAD (Aviation) principal consultant hoin Lengpui Airport-a passenger trolley indaih lohna sawi a ni a, sawrkarah trolley 100 lei belh an dil a. 2022 November 10 khan Finance department chuan remtiin, hun a duh rei loh zawk nan restricted tender hmangin 2023 February 17 thleng hawnna quotation chhuah a ni a, supplier thlan fel a ni a. Supply order issue atanga a reilo berah ni 30 velah trolley hi hmuh beisei a ni tih a sawi.
Hemi hma hian baggage trolley repair-na tur spare part pawh Delhi-ah chah a ni a. A lo thlen ni – February 13 & 14 khan repair nghal a ni a. Tuna baggage trolley hman 74 a awm mek tih a sawi bawk.
‘February 13, 2023 khan GAD (Aviation) chuan office order tichhuakin hnathawh nana baggage trolley hman a khap nghal a, an tihchhiat man hu chawi turin a hriattir a. February 14, 2023 khan trolley hman dan tur order khauh tak a tichhuak bawk,’ MNF hian tiin, trolley tihbawlhhlawh avanga Airport cheithat hnathawh kal lai titawp zawnga Congress party a che chu demawm a tih thu a sawi a ni.