Airtel-in Aizawlah 5G bul tan

Aizawla Airtel 5G Plus Services chu Thawhlehni khan chief minister Zoramthanga’n a tlangzarh.
Airtel-in 5G Plus Service a tlangzarh ta chu mipui tan tangkaina tam tak a thlen ngei a ring tih chief minister hian sawi a. Mizoram chu tlangram a nih avanga inkalpawhna kawng tihhmasawn ngai a la nih thu te, a panna kawng a thui avanga ei leh bara hmasawnna pawh duhthusama ala chak theih loh laiin, digital age-a kan awm chhawr tangkai a, hmun leh hmuna inawmchilh ngai kher lo in, internet kaltlanga thil tih theih tangkai tak tak a awm ta zel chu malsawmna a ni tih a sawi. Internet speed chak zawk chu healthcare, agriculture, education leh service sector ah tangkai taka hman a nih ngei a beisei thu a sawi a. Mizoram puma 5G coverage a awm thuai theih nan Bharti Airtel chuan hma an lak a beisei tih a sawi bawk.
Information & Communication Technology minister Robert Romawia Royte pawhin 5G service chuan inrelbawlna leh khawtlang nunah eng kawng emaw taka hmasawnna a thlen a beisei tih a sawi a. Bharti Airtel chuan mipui mamawh service tha tak a pek zel a beisei thu sawiin, corporate social responsibility kaltlangin khawtlang mamawh phuhruk theihna tur awmte a sawipui nghal a ni.
NESA Airtel CEO Rajnash Verma chuan Airtel hi India hmarchhaka 5G service bul tan hmasa bertu a ni, tiin, 5G service chu a tahtawl te tein kalpui chhoh a nih tur thu te, tun tumah hian Zarkawt, Tuikual North, Bawngkawn, New Capital Khatla, Durtlang, Zemabawk, Luangmual adt ah 5G hman theihna device (phone, tablet) ah chuan sum chawibelh ngai loin 5G network a zawm theih a ni.