Aizawl Bazarpui sak mek endik
Hmasawnna ruhrel duan mek endik tura state sawrkarin a din, Mizoram State Project Monitoring Committee (MSPMC) chuan Aizawl Bazarpui hmuna ‘Aizawl City Centre’ leh ‘Aizawl City Centre Annex’ sak mek chu Zirtawpni khan an vice chairman R Lal Rinawma, IRS (Rtd) hoin an endik.
Heng building pahnih sak meka thlen chin enfiahin, hmasawnna tithuanawp thei awmte a hmunah sawiho a ni a. MSPMC vice chairman chuan building inkara intlawhpawh tawnna awlsam zawk awm theih dan tur, felfai zawka bawlhhlawh tih ral dan bakah building sak mek chu tangkai thei ang bera hman a nih theih dan turte a enkawltu engineer leh contractor-te a sawipui a. A building enkawl leh zel dan tur, ‘operating and management’ a pawimawh, tiin, zawhfel a nih huna sum deh chhuah dan tur pawh sawi a ni.
MSPMC team-ah hian sawrkarin mithiam a ruatte bakah NGO leh political party aiawhte an tel a. A kaihhnawih department aiawhte leh Aizawl New market-a ei zawng, association 64 intelkhawmin a an din, chhungkaw 2000 vel awmna New Market Sumdawng Joint Association hruaituten an tawiawm a ni.
Aizawl City Centre hi New Market main building awm thinna hmuna sak niin, UD&PA department hnuaia Aizawl Smart City Limited enkawl a ni a. He project zawhfel nan hian Smart City Mission atanga fund hmuh cheng vaibelchhe 41.59 ruahman niin, 2023 January atang khan hna tan a ni. Tunah zaa 38 vel zawh tawh a ni a, a building hi Block A leh B a then tum a ni. Two wheeler leh 4-wheeler park-na tur hmun, service lift leh passenger lift bakah cold storage awm thei tura duan a ni a; dawr 1105 vel a awm thei dawn a ni.
Aizawl City Centre Annex hi tun hmaa Foreign Lane building awm thinnaa sak niin, Commerce & Industries department enkawl a ni a. He project zawhfel nan hian NEDP atangin cheng nuai 3641.59 ruahman a ni a, 2020 June atanga hna tan a ni. A building hi Block A, B leh C a then tum a ni a, dawr 132 leh dawrte (hawkers) 180 awm thei tura ruahman a ni a, hna zaa 70 vel zawh tawh a ni.
Heng project pahnih contractor leh consultancy firm chu Lushai Engineers Ramhlun South an ni.