Aizawl bypass kawng laihna leivung Tlawngah nawr liam

Aizawl bypass kawng laihna
leivung Tlawngah nawr liam
Aizawl bypass tlak lama kawng laih mek chu Tlawng luia nawr liam tawp a nih avangin environment humhalhtu pawl Centre for Environment & Social Justice (CESJ) chuan an hnathawh tihtawp lailawk tir an ngen.
CESJ sawi danin, mi hrang hrang atanga report an dawn avangin Sihhmui atanga Muallungthu inkar, tlak lama by pass laihna hmun, Tlawng lui kam hi an enfiah a. Kawng laih mek hian mihring tan pawi nasa tak a sawi nia an ngaih vangin Ningani khan Aizawl district magistrate hnenah an hnathawh titawp lailawk ‘stay’ turin ngenna an thehlut.
Aizawl bypass tlak lam kawng laih tur hi Tlawng kam zar zara alignment a kal avangin, CESJ hotute chuan 2024 May 14 khan Mizoram PWD engineer in chief leh hotu dangte an lo sawipui tawh tih an sawi a. Hmasawnna hna vanga environment dan leh hrai bawhchhiat pawi zia an sawi hnuah, kawng laih vung hi Tlawng luia a luh chuan National Green Tribunal emaw Supreme Court emaw ah an complaint dawn tih an lo hrilh tawh.
‘Aizawl khawpui nunna hnar Tlawng lui hi leivunga a khah tawh vangin, lui kuang a pawnlang vek tawh a, thalah a kangchat titih a. Furah lui kuang a pawnlang vang bawkin tui a lian hma em em a. Chhanchhuak turin eng pawh kan tih a ngai. Bypass kawng aiin mipui nuai 3-4 tui in tur a pawimawh zawk, tiin kan vaukhan a ni,’ CESJ chuan a ti.
Kumin June 16 khan PWD E-in-C hnenah lehkha an thawn leh a. Aizawl bypass laih meka environment dan leh hrai an zah lo leh, Aizawl khawpui tui tlan, Tlawng lui an dimdawi loh avangin, mipui hmakhaw ngaiin an tih tur an tih a ngai dawn tih an hrilh thu an sawi a ni.