Aizawl bypass road leh 4-lane sial meka bawhzui ngai sawiho
Aizawl bypass road leh 4-lane
sial meka bawhzui ngai sawiho
Mizoram-a sawrkar ruahmannaa hna thawh meka thlen chin leh harsatna bawhzui ngai ang chi chu chief minister Lalduhoma hoin an sawikhawm.
Mizoram Pro – Active Governance & Timely Implementation (Mi-PRAGATI) thutkhawm vawi hnihna chu chief minister kaihhruaiin Nilaini khan neih a ni a. A hmuna tel member an awm bakah inbiak hmuh theihna hmanga chhim an awm bawk.
Mi-PRAGATI hi state chhunga hmasawnna hnathawh lian zual vil a, harsatna an tawhte chinfel dan dappuitu tur leh a tul anga department hrang hrang thawhhona tichak tura din a ni a. Mipui tana rawngbawlna tam zawk, langtlang leh rang zawk kalpuina tur a ni.
An sawiho zingah, Aizawl Western side Bypass hna hi zaa 19. 56 thawh tawh a ni a. Kawngin a paltlang rama khawsa raltlante sawn dan tur, mimal quarry neituten zangnadawmna an phut chungchang, kawng laihin a nghawng huan thlai chante zangnadawmna, forest clearance leh leivung paihnaa harsatna awmte an sawi.
Leivung paihna hmunhma an endikna leh rawtna an neih chu Aizawl bawrhsap Er Lalhriatpuia’n a sawizau a. Hmalak zui dan tur an sawiho.
Vairengte – Aizawl inkar four lane sial mekah thutkhawm hmasaa sawi chhuah, electric power line sawn chu chinfel a ni tawh tih sawi a ni a. Harsatna dang an la tawhte chinfel dan an sawiho. Four lane kawngpui laih hi km. 90.110 a thui tur a ni a, heng zinga km. 60.295 chu greenfield alignment tura duan a ni.
PM SHRI (Pradhan Mantri School for Rising India) Scheme kalpui mekah Mizorama sawrkar school 35 chu PM SHRI kalpuina atan thlan an ni a, thawh 6-a kalpui tur niin a thawhkhatnaah school 22-ah hma lak a ni.
PMJVK hnuaiah Mizoramah project 104 pawm tawh a ni a, an zinga 84 chu thawh zawh tawh niin, thawh mek 18 a awm a. Sanction beisei mek a awm nual bawk.
Sairang – Thenzawl rel kawng survey chungchang sawiho a ni a. Thenzawl thlenga rel kawng kalna tur hi chinfel thawkhat a ni tawh tih Railways thuneituten an sawi.
Thutkhawmah hian a kaihhnawih minsiter leh sawrkar hotute an tel a. Mi-PRAGATI hi 2025 August-a din niin, chief secretary chu member secretary a ni a. Member-te chu – principal secretary, secretary leh deputy commissioner te leh state chhunga sawrkar laipui department /agency head ho an ni.