Aizawl district-ah CD ratio nei hniam ber bank – AXIS

Aizawl district-ah CD ratio
nei hniam ber bank – AXIS
Aizawl district-a bank 20 chuang inbunah kumin chhunga AXIS Bank chu credit deposit ratio nei hniam ber a ni a, zaa 11.02 a nei. Indian Bank-in a nei tha ber a, zaa 62 a nei.
Special District Consultative Committee (DCC), District Level Review Committee (DLRC) leh District Level Security Committee (DLSC) Aizawl 1st quarter (April-June) leh 2nd quarter (July-September) chu an chairman, bawrhsap Er Lalhriatpuia kaihhruaiin Nilaini khan an thukhawm.
Chairman chuan banker-te chu mipuiin an bank-ah sum dahlut se tih an duh ang bawkin, an ni pawhin mipui hnenah loan pekchhuah hreh lo turin a chah a; zaa 60% aia hniam credit deposit ratio nei lo turin a chah. CD ratio 40% aia hniam nei bank 9 chu an CD ratio hniamna chhan zawtin, tan la sauh turin a chah a ni.
Aizawl district-a bank awmte quarter hnih (April – September) liam ta chhunga an performance thlirlet a ni a. CD ratio zaa 0.73 in a pung. Bank 9-in CD ratio zaa 40 aia tlem an nei a, bank 15-in an khum thung. India Bank chuan 62.00% CD ratio neiin, nei sang ber a ni a; AXIS Bank-in 11.02% neiin, a hniam ber.
Kisan Credit Card hnuaiah mi 2264 hnenah loan pek chhuah niin, loan amount hi cheng nuai 5331.05 a ni. Sawrkar scheme hrang hranga loan pek dan, PMMY leh PMJDY hnuaia hmalakna, social security schemes – PMJJBY, PMSBY a hmalakna thlirho a ni.