Aizawl East II Invitation Basketball Tournament Derby match – Semi final boruak san zan!

Aizawl East II Invitation Basketball Tournament
Derby match – Semi final boruak san zan!
Armed Veng Basketball Club buatsaih inelna a tawp lam a inherchhuak dawn ta a, zanin hian derby match hmuhnawm fal bik thlir tur a awm ang.
Saron veng leh Chhinga vengin MSL Club an nei a; Armed vengin East II-a mumal taka basketball academy awmchhun an nei a, rawlthar nei tha ber veng erawh Armed veng south – hei hi zanina inkhel turte thlirlawk theih dan tawi thei ang ber a ni.
Semi final hmasa zawk
Armed Veng derby hi eng game-ah pawh ni se, a hmuhnawm lo ngai lo!
Kum 1987, November ni 5 khan Armed Veng VC atangin Armed Veng South VC hi an in dang a, he veng pahnih infiamna uar veng inkara inelna reng reng hi uangthuangin bul tan a ni ngai lova, boruak sang tak hnuaiah intihsiakna hi a tawp zui thin!
Kum 1995 bawr vel atangin police fa te leh civil mi tlem te thenkhatte hovin football uarna vengah hian basketball hi an beng sawt tan a, Armed Veng Presbyterian chhaka police ram ruaka tual zawlah khelh thin niin, KVM HS kawt lamah insuan chhovin Armed Veng M/S leh Muma M/S tual atangin basketball thli hi alh chho zel a – tunah chuan Armed Veng hian Mizorama basketball court (indoor) tha ber an nei ta hial.
Armed Veng hian player langsar an nei hmasa zawk a; tun dinhmunah erawh Armed Veng South lam hian players rawlthar tha za rual an kawl hnem zawk tawh thung!
He veng inthenawm pahnih thawnthu intawm tam tak nei hi zanin hian thawnthu ngaihnawm leh hlu zawk chhawpchhuah tumin an inep dawn a, Armed Veng tan an veteran player pathumin an khel dawn lova, East II huamchhunga basketball academy awmchhun (Jumpstart) viltu leh AV coach ni bawk, Dave-a kaihhruaina hnuaiah Rinpuia leh Awmawma te pahnih hi an veng rawlthar te tan thlamuanna tham an ni leh ang.
Armed Veng South tan hian Tea leh KC Malsawmtluanga ten an hriat bel sa players an rawn ho leh dawn a – rawlthar hmuhnawm Felix-a’n thlir rawn a hlawh leh ang. Boruak sangah Man-a leh Zorina bakah Sangsanga te theihna fiaha awm zan a ni dawn.
Avs hi East II-ah hian veng aiawh fehchhuak thinte tawiawm tha bera chhal ngam an ni tih hi tarlan hmaih chi a ni lo.
Semi final hnuhnung zawk
Mizoram basketball chan- china veng inelnaa thawm nei na leh result nei tha thin Saron Veng hian kum 2005 bawr vela an players tha rual zinga a tam zawk khan inkhelh chawlhsan tawh mah se, he veng hian mi danglam fal nalh H. Laldinsanga (Mapuia – the living legend) an nei.
Saron Veng hian kum 2019 khan Armed Veng YMA Golden Jubilee puala basketball tournament ah khan an champion a, hemi tum hian MVP chu Mapuia zu la ni thei nia!
Dina, Rina leh Biakmuana te ho hian final an luh theihna dal tum tur Chhinga Veng lakah hian veng thenawm derby match satliah an khel tawp lovang!
Anni hi MSL Club nei veng ni satliah an ni lo – basketball thiam veng an ni tlat!
Chhinga Veng hi Mizorama top league – cricket, football leh badminton lamah te an champion vek tawh – Mizoram Super League (MSL) XI a champion ngei tuma an rahbi sawhngheh nan Saron veng hneh a, final luh a, champion zui tluka duhthusam inherchhuak hi bawhpelh chi a ni lovang.
An coach Mapuia leh manager Henry-a te tan hian team game khel chhuak thei turin Peka leh Hriata te an khel tha fal thin a, |hasanga pawhin hma a sawn takzet.
He team hi an veng LC member Lalmuana’n a phuarkhawmin a uap hneh a, champion an sawi ngam e!