Aizawl hi i thawlh thawl zawk ang u….

Aizawl khawpui, chenna nuam leh hahdam zawk a nih theihnana a tul anga sorkar thurawn pe tur leh hma la tura pawl indin Aizawl Hmathlir Pawl chuan nimin khan thuchhuah siamin, UD&PA minster an ngen anga AR Quarter Guard bul, Mahatma Gandhi lim awmna thina cafetaria siamna tura UD&PA lamin ruahmanna a lo siam tawh leh building an sak tawh thiah leh a ni ta chu lawmawm an tih thu an sawi a. Aizawl Hmathlir Pawl hian Assam Rifles chhuah hunah pawh an kalsan tur ramah thing leh pangpar phuna Aizawl mipuite thawklakna leh lenkhawthawnna park nuam tak siam an duh thu leh, hemi chungchangah hian chief minister pawh hmuh an tum thu an sawi bawk a ni.
Aizawl khawpui traffic tawt avanga harsatna kan tawh thin dan hi kan hria, kan hmu, kan tawng tlang vek. Kawngpui zauh leh siam belhna tur hmun awl tha a awm tawh lova, kawngpui awmsa zawh tur lirthei lah chu ni tin a za telin a pung zel bawk si. Chutih laiin, mipui punkhawmna hmun lah a lai lum lamah kan la din belh sauh sauh zel bawk a. A awmsa thawlh thawl kan mamawh em em laia a lailum lama sawrkar department berin traffic ti tawt zual thei cafeteria dah an lo tum hi, thil inhmeh lo angreng tak niin a lang.
Kan senior citizen ten khawpui tana khawthlirna hmun tha kan neih chhun Chanmari-Chaltlang inkar leh, Bawngkawn-Durtlang Leitan inkar humhalh tuma theihtawp an chhuahna pawh, boruakah a thamral chu a ni leh ta mai a. INTACH Mizoram Chapter ten helai hmun pawimawh pahnih humhalhna tura theihtawp an chhuahna dodal zawng hlira a kaihhnawih thuneitute an che tlat zel mai hi, hmathlir thui kan la neih tawk lohzia lanna pakhat a tih theih awm e.
Hotel a ni emaw, restaurant/Cafetaria etc. thar kan din dawn a nih pawhin, hmun fianrial, khawpui pawn lam deuh pan thei ila, chutiang tur chuan thuneitute pawh hian rilru seng tawh sela, chuti a nih loh a, a lailum lam kan bawh zel a nih chuan, kan la inbawh chim rem rum mai ang tih hlauhawm tak a ni.
A awmsa thawlh thawl kan mamawh em em tawh lai hi chuan, a dang phun belh zawnga hmalakna hi chu bansan kan mamawh tawh hle niin a lang.