Aizawl hnawm paihna tlawh

Mizoram larsap Indra Sena Reddy Nallu chuan Nilaini khan Solid Management Centre (SWMC) Tuirial tlawhin hmalakna hrang hrang a enfiah a, hemi kaihhnawih department hotute a kawm.
Khawpui thang zelah hnawm a pun chak avangin a nih dan tur ang taka hnawm lakkhawm sawngbawl a tul tih larsap hian a sawi a. Hmasawnna ruhrel lian leh pawimawh tak tak enkawl zui leh tuaihnum kawngah tanrual a tul, tiin, harsatna a awm a nih pawhin kan zavaia ngaihven tlan a ngai tih a sawi a ni.
Solid Waste Management Centre Tuirial hi UD&PA department hnuaia State Investment Programme Management and Implementation Unit (SIPMIU) hmalaknaa North East Capital Cities Development Implementation Programme hmanga sak niin, kum 2019 khan hawn a ni a, kum 2022 khan Aizawl Municipal Corporation kuta hlan a ni.
AMC tarlan danin, Aizawl khawpui chhunga hnawm sakhatte chu Pathianni tih loh, kar tluanin he hmunah hian phurh luha sawngbawl thin a ni a, hemi tur hian AMC chuan thawktu 35 a ruai. Nitin hnawm paih truck 190 velin bawlhhlawh ton 119.42 vel an chhung khawm a; heng zinga ton 89.09 hi bawlhhlawh hnawng (wet waste) niin, a dang ton 30.33 hi bawlhhlawh ro (dry waste) a ni. Hengte hi sawngbawl niin, nitin dry waste ton 7.98 vel hi hmannawn (recycle) leh theih turin AMC pawmpui scrap dealer 11 hnenah hralh thin a ni a, wet waste hi Mechanical Compost Plant hmangin kumin March atang khan leithaa chantir zel a ni.
Larsap hi Aizawl bawrhsap Er. Lalhriatpuia bakah AMC leh UD&PA hnuaia Aizawl Smart City hotuten an tawiawm a ni.