Aizawl khawlai a ngap leh
A zia deuh lai a awm a, mahse a zia rei thei tak tak lo te pawh a ni ang, tunlaiin Aizawl khawlai a ngap leh a, ruihhlo leh a sulhnu a langsar leh hle.
YMA-in theihtawp chhuahin khawlai then fai hna hi an thawk a, khawlai pawh a fai phah thin. A fai vuk lai pawh a awm a, mahse a ngap leh thin. Tun hnaiah pawh a ngap thar leh a, thil hmuhnawm loh tak tak hmuh tur a awm thin.
Central YMA hnuaia ruihhlo dotu pawl Central Anti Drug Squad (CADS) te’n theihtawp chhuahin khawlai then fai hna hi an thawk a, ruihhlo buaipuia khawlaia talte an hruai khawm thin. Mi 1926 chuang an hruai khawm tawh thu an sawi.
2025 kum tawp dawn hnaihah khan CADS hian khawilaia ruihhlo buaipui thinte hruai khawm hna hi an thawk tan a, an mi hruai khawmte hi counseling class an kaltir thin. Ruihhlo vanga harsatna tawkte enkawlna home-a dah an nei a, excise department kuta dah pawh an nei.
CADS hian counselor an nei a, an mi hruai khawmte hi counselor hian a kawm thin a ni. An mamawh dan azirin ni nga aia tam kawm te pawh an awm.
CADS hruaitute chuan an mi hruai khawmte hi ruihhlo chungchang chauh ni lovin thil dang sawipui pawha an kawm thu an sawi a, inti fai tur te pawhin an fuih thin tih an sawi.
CADS bakah veng chhungah YMA te’n ruihhlo do kum bawhzuiin ruihhlo an vai thin a, ruihhlo vanga harsatna tawkte pawh an buaipui hlawm. Chuti chungin khawlai a fai tak tak thei lo a ni ber e.
Aizawl hmun lun lai hmun hrang hrangah ruih tur zawng an kalkhawm a, chhun pachangah pawh an rui nghal mai thin tiin a sawi theih ang. Vanapa Hall bul vel hi hmun lun a tling a, kum hmasa lam atang tawh khan Vanapa Hall bul velah hian chhun engah pawh duh tawkin ruihhlo a khawih theih niin a lang. Thil hmuhnawm loh tak tak hmuh tur a awm thin a, heng lai vel paltlang thinte chuan inchiu lai te pawh an hmu fo ang. A zia lai a awm a, a fai kuar lai pawh a awm. Mahse tun hnaiah a lun leh a, hmun dang pawh chuti tho chu.
CADS hruaitute chuan a hautak thu an sawi a, ruihhlo a hluar em avang te, an indaih loh avang tein Aizawl khawlai hi a fai tak tak thei lo nia an hriat thu an sawi.