Aizawl khawpuiin tui hnianghnar rih dawn lo

Aizawl tui tlan Tlawng lui a lian a, hei hian kawng hrang hrangin nghawng a nei. Aizawl khawpui tui lak leh sem a nghawng dawn a, PHE department lam chuan tui sem hna hi a pangngaia a kal theih an beisei hnai lo.
May ni 27 atangin ruah nasa tak a sur a, ni 28 tuk atangin Reiek kai velah Tlawng hi a lian a ni. Tlawng tui lak hnathawktu PHE department chuan 2017 June kha Tlawng lui len ber tum an ti a, khami tuma a chim chin an chhinchhiah kha ni 28-ah hian metre khat leh a chanve velin a pel a ni. Heti taka tui lian hian tui lak hna a nghawng a, mipui hnena tui sem pawh hun engemaw chen a khaihlak dawn tih an sawi.
Tlawng lui tui hi Greater Aizawl Water Supply Scheme (GAWSS) Phase I leh Phase II hnuaiah thawh a ni a, PHE department hotute chuan Phase I hi a pangngaia a kal leh theih nan thla khat vel, Phase II atan kar khat vel a ngaih an ring.
Siam ngaite an siam chhungin generator hmangin ni khatah tui litre maktaduai 8 vel pump an tum a, mahse hei hi eng tham a ni lo; ni khatah tui litre maktaduai 30 vel an pump theih chuan Aizawl mipuiin tui an harsa lo tiin an chhut thin.
PHE department hotute’n The Aizawl Post an hrilh danin, Phase II-ah ni khatah tui litre maktaduai 18 te, 19 te an pump thin a, Phase I-ah litre maktaduai 9 te, 10 te an pump thin. Phase II a pangngai hunah ni khatah litre maktaduai 18 te, maktaduai 19 te an pump theih chuan a zia ang tih a ni.
Tui lian khan an khawl engemaw zat a la a, pump house leh khawl engemaw zat a chim bawk. Pump house leh khawl a chimah hian chirhdiak nasa tak a hnutchhiah a, chung chu tifaia en fel phawt a ngai tih te, chu ringawt pawh chu hna hautak a nih thu te, khawlte chu a chhia nge chhe lo tih hriat a nih loh thu te, a chhiate chu siamthat leh phawt tur a nih thu te PHE department hotute chuan an sawi a, nghah deuh a ngaih tur thu, thawktute’n theihtawp an chhuah thu te an sawi.
Pump house-ah hian mi 10 vel an riak thin a, muttui vanglai, zing dar 4 vela tui lianah nunna chan an awm lo chu thil lawmawm chungchuang a nih thu an sawi a, electric current an off hman hlauh a, an insaseng hman hlauh, an ti.
May ni 28-ah khan Tlawng lian hian Sihhmui leh Sairang a thleng a, an lawngte pawh engemaw zat a la.
Sairangah hian chhungkaw 53 an inthiar chhuak a, sikul pakhat, anganwadi pakhat, Hindu mandir leh Mosolman mosque pakhat a chim bawk. Buichali-ah pawh Tlawng lian hian kawngpui a chim a, khup chen velin a chim tih thu dawn a ni.
Ni 28 zan vel atangin Hortoki leh Bairabi vel a thleng thla a, Bairabi-ah chuan fimkhur thu-ah chhungkaw 13 vel an inthiar chhuak.
Sairang-ah chuan chawhnu lam atangin tui hi a kam a, Sairangah hian YMA hruaitute’n an hriat china Tlawng a len ber tum a nih thu an sawi. Bairabi lamah pawh a tuk atangin tui hi a kam.