Aizawl leh Khawzawl an chak

Mizoram Football Association (MFA) buatsaih Inter District Junior Boys Football Championship 2023-24 chu Thawhtan zanah kick-off a nih hnuin Thawhlehni khan khelh tan a ni a; Aizawl DFA leh Khawzawl DFA ten awlsam takin hnehna an chang nghal.
PMYVK Inter District Junior Boys Football Championship 2023-24 a inkhel hmasa berah Lunglei leh Kolasib Dsitrict ten inkhel hmuhnawm an lantir nghal a. Inkhel hmuhnawm takah Kolasib DFA in 4-2 in hnehna an chang.
Kolasib DFA tan hian Brett VL Malsawmhlu-a’n minute 21-naah hmahruaina goal a thun a. Chawlhlawk hmain C. Laithantluanga leh Moses Lalnuntluanga ten goal an thun belh leh bawk a, si thum faia hmahruai chungin chawlhlawk an hmang.
Chawlhlawk hnu lamah Lunglei game a kang viau a, na takin an khingpuite an nawr let. Lunglei DFA tan hian H.Lalruatdika chuan minute 56-naah goal thunin an si phurh a sut then. Goal lut a awm belh loh reng hnuin minute 86-naah Amosa Malsawmtluanga chuan an goal hnihna a thun zui leh bawk. Lungleiin point hmuh beiseina an neih san lai takin Kolasib tan F. Zonunsanga chuan minute 90+1-naah an goal lina a thun zui leh a, an chakna a nemnghet zui ta a ni.
Thawhlehnia inkhel pahnihnaah Khawzawl DFA chuan an khingpui Serchhip DFA chu ri ruk fai ngawtin an sawp a, quarter-final an hnaih nghal kuarh. Khawzawl tan hian Jacob Lalmuanpuia leh Lalzarzokima ten hattrick an siam ve ve. Khawzawl hian Saitual DFA an hmachhawn zui leh dawn a, si ruk fai ngawta chak tawh an nih vangin an tan quarter-final luh a awlsam viau tawh tura ngaih a ni.
Inelna tan nia inkhel hnuhnung berah inelna thlengtu Aizawl DFA chuan Lawngtlai DFA an hmachhawn a, goal chhuah hmasa zawka tan chungin ADFA Junior team te hian 4-1 in hnehna an chang let.
Inelna thlengtu Aizawl DFA te hian beisei loh takin Lawngtlai lakah bul an tanchhia a, goal an chhuah thuai. Minute riatna lekah an khingpui tlarhnungte tihsual hremin Lawngtlai tan Joel Lalrinfela chuan awlsam takin hmahruaina goal a thun. Goal an chhuah hnuin Aizawl an insiamtha mai thei lova, an khel a buai chhunzawm. Goal thun tuma an khingpuite nawr tlangin Aizawl DFA hian penalty an hmu a, Lawngtlai player hnawhchhuah a ni bawk. Penalty hi captain Vanlalpeka chuan minute 34-naah inringtawk takin a pet goal a, an si phurh a sut. Peka goal hian game a thlak danglam a, Aizawl in game an thunun zui nghal. Player tam zawk Aizawl tan hian Francis Lalhruaizela chuan minute 38-naah hma an hruai letna goal a thun a, 2-1 a hmahruai chungin chawlhlawk an hmang.
Chawlhlawk hnu lamah Aizawl in inkhel an thunun zui a, hun tha hloh nual chungin goal hnih an thun belh leh. Minute 50-naah Lalruatsanga chuan mawi zetin a pet goal a, an hmahruaina a tizau. Ruatsanga goal thun hnu hian hmahruaina goal thuntu Vanlalpeka chuan minute 62-naah an goal lina a thun zui leh a. An khingpuite nen an inkar a tizau. Hun tawp thlengin goal a luh belh thei lova Aizawl DFA hian 4-1 in Lawngtlai DFA an hneh zui ta a ni.
PMYVK Inter District Junior Boys Football Championship 2023-24 hi vawiin zing dar 9:00 ah khelh chhunzawm a ni ang a. Champhai DFA leh Siaha DFA an inhmachhawn ang a. Dar 11:30-ah Mamit DFA leh Lunglei DFA an inhmachhawn zui ve leh bawk ang. Lunglei hi Kolasib laka tlawm tawh an nih vangin quarter-final luh beiseina nei zui turin Mamit lakah chak an mawh. Inkhel hnuhnung ber chawhnu dar 2:00-ah Saitual DFA leh Serchhip DFA te an inhmachhawn ve leh bawk ang. S
PMYVK Inter District Junior Boys Football Championship 2023-24-ah ian Mizorama district 11 atangin under 15 team 11 ten inelna an hmachhawn a. January ni 26, Zirtawp tlaiah final khelh tura ruahman a ni. He inelna hmachhawn tur district hrang hrangte hi Group pali-ah then an ni a. Group D-a team hnih; Champhai leh Siaha an awm laiin Group dang pathumah team thum theuh an awm. Inelna thlengtu Aizawl District Football Association (ADFA) junior team te chu Group C-ah Hnahthial leh Lawngtlai District te nen an awm tlang.
Group A-ah Lunglei, Kolasib leh Mamit DFA te an awm a. Group B-ah Serchhip, Khawzawl leh Saitual DFA an awm ve bawk.