Aizawl Smart City Project hnuaiah Vantlang hman tur pahnih siam dawn

Aizawl Smart City Project hnuaia sak tur pahnih – Chaltlang Sports Multipurpose Hall DIET Complex sak tur leh Tourist Lodge Chaltlanga Aizawl Tourism Centre tihchangtlun tumna lungphum chu Thawhlehni zing khan deputy chief minister Tawnluia’n a phum.
Deputy chief minister chuan project pahnih tihpuitlin a nih theihna’n department hrang hrangin an tawiawm tha tih a sawi a. Chaltlang chu a project awmna veng, Aizawl leh Zoram pumpui fuankhawmna leh infiamna hmunpui enkawlna kawngah sawrkar chu khawtlang hruaituten tawiawm zel tur leh tangruala taka thawkho turin a sawm. Tourist Lodge chu khualzin thlenna piahlamah Aizawl khawpuia puipun theihna leh tangkai taka hman theih tura ruahman belh chu sawrkar ngaihpawimawh a ni, tiin, thalaite tan Sports Multipurpose Hall dang an siamsak thei tur chu lawmawm a tih thu a sawi.
Smart City Project chu kum 2024 thleng pawhsei a ni a, hemi chhung hian project pahnih hi zawh tum a ni tih a sawi a. Sum awmsa a nih avangin contractor-ten hma tha tak leh fel taka an zawh theihna’n bill chungchangah sawrkar lam atangin buaina a awmloh tur thu a sawi a. Contractor-te pawhin uluk taka hna thawk turin a chah a ni.
Aizawl mayor Lalrinenga Sailo chuan India ram khawpui dang ang bawka kan khawpui a lo mawi a, mipui mamawh hrang hrang a awm tur chu lawmawm a tih thu a sawi a. Mizo ngei thawhna project pahnih chu Zofate thiamna in ramdang thiamna a el pha a ni tih hria a, hna tha taka thawk turin a chah.
Sports Multipurpose Hall sa tur, contractor hi H Sanga, Vaivakawn Road Chanmari Aizawl a ni a. Cheng vaibelchhe 13.52 senga sak tur a ni. 2022 November 15 khan contract agreement siam a ni. Basketball court, table tennis, boxing ring, gym, parking leh dormitory a awm dawn a. Terrace level-ah 4-wheeler parking 10 leh first floor-ah 2-wheeler parking 64 leng tura ruahman a ni ang.
Aizawl Tourism Centre tihchangtlunna hi cheng vaibelchhe 18.11 senna tur a ni a, contractor chu M/s Allied Concern Dawrpui an ni. Kumin February 10 khan contract agreement siam a ni a, May 9 khan hna bul tanin, 2024 June 30-a zawh tura beisei a ni. Ground floor, basement I, II, III a awm anga, mi 400 leng tur auditorium chu first floor ah siam a ni ang. Roof plan atan hybrid solar panel siam tum a ni.