Aizawl thli luankhawmna enin faina lama kan hniam zia a lang – Dr Vanlalthlana

Aizawl khawpui thli luankhawmna lui enin, faina kawnga kan la hniam zia a langchiang tih minister Dr Vanlalthlana chuan a sawi.
Aizawl Municipal Corporation Ward No.III corporator C Lalchhandami hmalaknaa an ward-a ‘Fai Inelna 2024’ result puan leh lawmman semna hun a hmanpuinaah Aizawl North-II bialtu MLA, minister Dr Vanlalthlana chuan faina chungchang a sawia sawi mai ni lo, a taka hma latu corporator an nei chu lawmawm a tih thu a sawi a. Kan bawlhlawh leh ek thli thehthang danah mipuiin rilru thar kan put a ngai hle, tiin, “Chite lui venhim kawngah theihtawpin hma kan la mek a, tuiluankawrah bawlhhlawh kan luankhawm tir hi a pawi hle. Aizawl khawpui thli luankhawmna Chite lui en hian, Mizote faina kawnga kan la hniam zia a langchiang a, hma sawn kan ngai,” a ti.
Hmanpuitu dang AMC commissioner Joseph Lalramsanga chuan Ward No.III corporator-in faina kawnga inelna a buatsaih chu ward dang tan pawh entawntlak a tih thu sawiin, “Aizawl balh leh a faiah mipuiin mawh kan phur a, AMC pawhin kan khawpui a fai theih nan hma a la mek zel a ni,” a ti. Bawlhlawh khawknawm atangin thil siamchhuah lam an kalpui mek tih a sawi bawk.
Inelna hi chi thuma siam a ni a. PPP mode tih tur, BKHP tih tur, school fai inel a nih bakah vengchhunga faina kawnga mi entawntlakte thlang chhuakin chawimawi an ni.