Aizawla AIBE Centre dah turin Council ngen

Aizawla AIBE Centre
dah turin Council ngen
New Delhi-a kal Law & Judicial minister TJ Lalnuntluanga chuan Zirtawpni khan Bar Council of India chairman Manan Kumar Mishra chu a office-ah a kawm.
Law minister hian Mizoram Law College Student Bar Council ngenna bawhzuiin Bar Council of India chairman hi hmu in, tul leh pawimawh a sawipui a. Mizorama law graduate-ten law an practice theihna’na pawimawh tak, All India Bar Examination (AIBE) Centre Aizawla a awm loh avangin Guwahati emaw Shillong emaw ah exam hmachhawn tura kal a ngai thin a, hei hian an tan harsatna a thlen thin tih a hrilh. Aizawla AIBE Centre din a nih theihna’n hma lak sak turin a ngen a ni.
Bar Council of India chairman chuan Mizoram minister thu thlen chu a ngaihpawimawh thu leh Bar Council of India General Council hmasa berah ngaihtuah atan an lo dah tur thu a sawi a. Aizawla All India Bar Examination Centre din a nih theihna’n a tul angte bawhzuia hma lak a tum thu a lo hrilh.