Aizawla damdawi dawr zingah dan zawm tur zawm lo la awm

Aizawla damdawi dawr zingah
dan zawm tur zawm lo la awm
Civil Hospital Aizawl chhehvela damdawi zawrhna dawr enfiahnaah district magistrate thupek zawm lo an la awm a. Damdawi zawrh kaihhnawiha danin a phut ang zawm lo an awm nual bawk.
Naupang kumtling lo leh school uniform ha ten ruihna atana hman chi damdawi an lei tur venna atana damdawi dawr (heng damdawi kawl pha chin) chuan an dawra damdawi leitute lang thei ngeia CCTV vuah vek turin Aizawl district magistrate chuan thupek a lo siam tawh a. Hemi bawhzui hian Ningani khan executive magistrate hoin Food & Drugs Administration-a drugs inspector leh Police tangho chuan an endik.
Civil Hospital Aizawl chhehvela pharmacy 64 endik an ni a, a tlangpuiin pharmacy-te hian district magistrate thupek an zawm tha. Pharmacy 7-in CCTV an la vuah loa, heng mite chungah hian a tul anga hma lak zui a ni dawn.
Pharmacy endik zinga 31 hian damdawi ruihnana hman theih chi leh antibiotic hralh fimkhur ngai bik ziahna tur, Schedule H1 register an vawng tha lo. Damdawi dawr zingah pharmacist thutchilh dawr 17 chauh an awm a, a dang zawng hian pharmacist enpui lohin damdawi enkawlin, an pe chhuak thin tih hmuh a ni.
Pharmacy Act 1948 leh Drugs Rules 1945 ah chuan, damdawi dawrah pharmacist an awm reng anga, an ni enpuina in damlo hnenah damdawi pek tur a ni, tih a ni. Pharmacist hian damlo hnenah a tul anga counselling pe in, damdawi ei dan tur dik leh damlo hriat tur pawimawh a hrilhhre thin tur a ni, tih a nih bakah pharmacy-ten ruihna atana hman theih damdawi reng reng fimkhur taka an hralh a ngai a, an hralhna cash memo copy leh register an vawngtha tur a ni, tih a ni bawk. Damdawi dawr hi a tul anga endik chhunzawm tum a ni.