Aizawla ran talhna hmunah thla khatah ran 600 vel talh

Aizawlah slaughter house pahnih a awm a, hengah hian thla khatah ran 500 atanga 600 inkar vel talh ziah anga ngaih a ni.
AH & Vety department hotute sawi danin, Mualpui Salem Veng leh Bawngkawn Brigade hmunah Rural Slaughter House a awm a, Mualpui ami hi a tam zawk hman a ni. He hmun hi department lam atangin doctor pakhat bakah ran talhtu telin staff dang pali velin an thutchilh a, doctor hian ran talh tur hi an hriselna an endik sak a, hnawl ngai khawpa mihring tana hlauhawm natna pai an awm meuh lo tih sawi a ni.
Slaughter House-a an talh tam ber chu bawng a ni a, vawk a awm zeuh zeuh a, sial bakah lawi pawh an talh thin tih an sawi a. Brigade bik pantu hi vawk talh thinte an ni tih an sawi.
Kar tluanin talh tur a awm deuh reng a, zan dangah chuan ran 10 vel an talh tlangpui lain, Zirtawpni zanah chuan ran 80 leh a chunglam a ni deuh reng tih an sawi bawk.
Ran talhna hmunah hian a duh duhin ran a talh tir ngawt theih loh a, AH & Vety department-in sa sat tura license a pek, butcher license nei tan chauh talh tir theih a ni. Mualpuiah hian hetiang license nei 48 an awm a, Brigade-ah hian license ei 6 an awm. Brigade lam hi a hmun a tet bakah a panna a hla a, a panna kawng a that vak loh bawk avangin a lun lo zawkah a tang nia ngaih a ni tih an sawi.
Ran talh tur nei hian ran pakhatah Rs.300 an chawi ve thin a, butcher license nei tur erawh chuan sum sen a ngai loa, smart card siamna man Rs.100 chu an lak chhun a ni. License hi kum khat atan zel niin, renew ngai a ni.
Chutihrualin license nei tur hian TB natna kai loh an ni tih finfiah a ngai a, TB kai leh kai loh pawh hi a thlawna tih theih a ni. TB an neih leh neih loh an endik sak chhan hi, ran leh mihringin an kai kawp theih natna langsar tak a nih vang a ni tih department hotute chuan an sawi.
Slaughter House kalpui tur hian Food Safety and Standards Authority of India atangin license neih a ngaih bakah State Pollution Control Board phalna a ngai bawk a. Hemi ang hian FSSAI leh MPCB chuan kumtin an endik thin. Krismas leh kumthar vuakveta kohhran ruai thehna tur ran hi heng hmuna talh thin a nih avangin thawktute hi hunpui ni khat leh zan khat an duty tlang tawp thin a, heng hunlaia ran talh hi an hriselna erawh endik a ni ngai lo tih an sawi.
Animal Slaughter House hi Municipal kuta awm tur a nih angin AH & Vety department chuan Aizawl Municipal Corporation hnenah hlan a tum a, thil tul buaipui mek a ni tih thu dawn a ni.
Hetihlai hian Thawhlehni khan AH & Vety department leh ICAR- NMRI Hyderabad tangdun chuan Aizawla sa zuarte tan sa thianghlim, mipui tana him leh a hlutna tisang thei tura sawngbawl dan zirtirna an buatsaih a. Resource person atan ICAR- NMRI Hyderabad principal scientist Dr Suresh K Devtkal, Dr Michael V Lalrinzuala, veterinary officer leh CVSC& AH Selesih-a assistant professor Dr Vandita Mishra ten an zirtir. Training-ah hian ran talh thin leh Aizawl barza-a sa zuar mi 20 an tel a ni.