A huhovin World Cup

1998 vel thleng kha chuan a huhova World Cup en kha tih dan tur ve renga ngaih a ni tiin a sawi theih ang. 1990 World Cup te, 1994 World Cup te kha Mizoram mipuiin a huhovin an en nasa a, 1998 World Cup pawh a la ni tho ang.
Tunlai khawvelah a huhova en hi a hma angin miin an uar ta lo a, a huhova en la awm tho mah se tun hma ang kha chu a ni tawh lo. Chutih laiin Sialsir khuaah chuan thil nih dan pangngai a la ni a, an la en ho luih luih mai.
Hrangturzo bial khua Sialsir hi in 56 an ni a, mi 314 vel an cheng. World Cup an ngaihlu a, 2026 World Cup pawh an en nasa, a huhovin an en a, in pathumah an en ho thin.
Sialsir atanga thu dawn danin, an khua hian khawvel hmun danga mite ang bawkin TV an uar tawh lo a, set top box an tinung tawh hlawm lo. Amaherawhchu, rinrawla an neih internet hi football en nan a chak tawk lo. Chuvangin TV set nei chungin chhungkaw tam zawk chuan mahniin inkhel an en thei lo.
TV an theihna in pathum emaw a awm a; chhungkaw pakhat chuan DTH (Direct to Home) an nei a, chhungkaw pahnihin jio connection chak tha an nei bawk. Chung in pathumah chuan an en ta thin a ni.
“A en chak chuan mahni remchannaah kan en mai a, nuam kan ti tlang khawp mai. En ho hi a nuam a, tun hma pawh khan keini khua hian kan uar reng reng a,” an VC president Vanlalrema chuan a ti.
“In neitute’n mi an dawl zo khawp mai a. Thingpui te an ngaihtuah a. Tin, thenkhat chuan mahni an intum a, vaia ei tur sawhchiar ngaihtuah te pawh an awm a,” a ti bawk.
Ronaldo te chak loh vanga ngui an awm a, Messi te chak vanga hlim pawh an awm. Paho chuan Japan leh South Korea an tan a ni awm e.
Inah hian an tawt thei khawp mai a, an len loh chang pawh a awm. Tukverh an hawng a, pawn atanga en an awm chang te pawh a awm.
“Keini khua hi chuan tun hma atangin a huhova World Cup en hi kan uar hrim hrim a, vawiin thlengin kan la ti ta zel a ni mai e. Nuam kan ti khawp mai,” an VC president chuan a ti.
Sialsir khaw tlangval Malsawma chuan Argentina leh Switzerland inkhel kha entu an tam bera a rin thu a sawi a, thawm rin ber tum chu Spain leh Portugal inkhelh tum kha a nih a rin thu a sawi. “Portugal tante thawm a ring a, a tan lotute thawm a ring bawk a,” a ti.
“World Cup hi tunlaia kan titi ber chu a ni mai a. A huhovin kan en a, kan khawtlang pawh kan inkawmngeih phahin ka hria. Nuam kan ti tlang khawp mai,” a ti bawk.
An khaw GSA (Games & Sports Association)-in whatsapp group-ah chak tur inrinsiak an ti thin bawk a, Rs 100 te, Rs 200 te a dawn theih. Semi final lut ram palite hian Sialsira tantu ngah ram an ni tih hria se, an lawm ve tho ang!