Aizawlah Earth Day hmang

April 22 hi Earth Day a ni a, khawvel leh leilung vawnhimna lam inhrilhtharna atana hman thin a ni. Aizawlah pawh Environment Forest & Climate Change department huaihawta hman a ni a, kumin Earth Day thupui chu “Planet vs Plastics” tih a ni.
He hun hmanpuitu principal chief conservator of forest Ashok Kumar Biswal chuan ram dang nen khaikhinin Mizoramin ramngaw a nei tha a, amaherawchu a enkawl leh venhim lamah hma lak that a ngai tih a sawi. “He khawvel hi kan ta niloin, khawvel ta kan nih angin, zah tak leh duat taka enkawl tur kan ni,” a ti.
Hmanpuitu dang, Centre for Environment & Social Justice working chairman, environment activist Vanramchhuangi chuan, plastics chu political will a awm chuan mipui hnatlang tha nen kan do hneh thei, tiin, “Khapna dan kenkawh that a nih loh chuan kumtluanin hnatlang mah ila, hnatlang tha a uihawm thlawn a ni mai,” a ti.
He hunah hian Joseph Lalrinfela Hlimen hnenah “SEL Foundation Award for Clean & Green Earth” hlan a ni a. Joseph Lalrinfela hi kum 9 mi a ni a, a hunawlah nula tlangval len khawthawnna hmun hrang hranga plastic bawlhhlawh a chharkhawm thin. Chu chu SEL Foundation Chanmari chuan hriatpuiin chawimawna hi a pe a; sumfai Rs. 25000 leh citation a keng a ni.
SEL Foundation neitu, environmentalist Saizampuii Sailo chuan Pathianin rem a tih chuan Mizoram environment cheureu nasa lutuk siamthatna kawnga mipui awareness siamnan, kumtin award chi li siam an tum tih a sawi a. March 3-ah World Wildlife Day nungcha humhalh tha khua hnenah; March 22 Wold Water Day-ah tuihna humhalh lama thawk tha mimal emaw pawl emaw hnenah; June 5 World Environment Day ah environment renchem leh humhalh lam thawk tha mimal emaw pawl emaw hnenah; April 22 Earth Day ah leilung humhim tura faina leh thianghlimna kawnga thawk tha mimal hnenah hlan tum a ni tih a sawi.