Aizawlah Mahindra XUV 3XO REVX tlangzarh

Mahindra & Mahindra chuan XUV 3OO tuai tharin April 2025 khan XUV 3XO tih hming puin a pho chhuak a, May 2025 atangin India-ah an hralh chhuak tan a, Mahindra-in SUV a neih zinga a hralh hnem ber dawttu ni zuiin April 2024 atanga March 2025 chhungin 1,00,905 an hralh hman a. Hmasawn leh zual turin XUV 3XO awm sa bakah variant dang REVX an tichhuak leh ta a ni.
Mizorama Mahindra full range dealer Mana Motors chuan nilaini khan an showroom, Bawngkawnah XUV 3XO REVX hi tlangzarhin, Dealer Principal Dr Franklin Lalrinngheta leh a nupui Lalawmpuii’n an khuh hawng a, model chi hrang pathum awmin showroom-ah Rs 8,90,000 atanga Rs 12,90,000 man te an ni.
Dr Franklin-a chuan, “Car thar hlak a ni lo va, XUV 3XO kha kawr thar an haktir a, a pawn leh chhungah danglam hret hret a awm a, petrol engine hmang veka siam a ni. Turbo direct injection hmang a ni a, a man atanga ngaihtuahin Mizoram kawng chhuk chhovah a chak tha hlein ka hria,” a ti.
Kawng hrang hrangah XUV 3XO pangngai aia mipui hip zawk tura duan a ni a, a security lamah ADAS Level 2 a thuam a nih bakah, engine TCMPFI 1.2L, 110bhp leh 200nm torque leh TGDI 1.2L, 130bhp leh 230nm torque pe chhuak thei a a ni.
Mana Motors hian Mahindra siam chauh ni lovin car hlui hrang hrang a tharin an thleng thei bawk a, a bikin XUV 3XO REVX a lo chhuah tak avangin XUV 3OO leh XUV 3XO pangngai neite tan thleng theihin kawng a hawng zau lehzual.
An sumdawnna tihlen zel nan leh mipui tana an inhman chhuahna ni pah fawmin LPS Vision an thawhpui mek a, August 5 atang khan tunlaia show hriat hlawh tak Mahindra XUV 3XO Mizo Talent tan a ni a, August 30-a zawh tur niin zanin hian top 10 intihsiakna neih a ni ang.