Aizawlah ULLAS Mela nei

Ni hnih awh tur ‘ULLAS Mela & Mizoram Samagra Shiksha Exhibition 2024’ chu Aizawlah neih a ni a, Thawhlehni khan School Education minister Dr Vanlalthlana’n a hawng.
Samagra Shiksha hmalakna avang hian zirna hi a kal tawk tawk a, an hmalakna a pawimawh hle tih Dr Vanlalthlana hian a sawi a. Mizoramah zirna in hma a sawn loh chuan khawtlangah zan mut theih loh khawpa buaina, chhungkaw buaina a awm thin, tiin, khawtlang leh chhungkua hahdamna kan tuak chhuah a ngai a, chumi atan chuan zirtirtute leh officer-te tanho a ngai tih a sawi.
Zirna kawnga ngaihdan leh rawtna nei tan hrilh thin turin minister hian a chah a. Ngaihdan nei chu inthlahrung lo turin a sawm.
ULLAS state project director Lalsangliana chuan ULLAS-in a tum chu, mi zawng zawngin ziak leh chhiar an thiam theihna atana hmalak a ni a; Mizoram sawrkarin zaah za ziak leh chhiar thei tura tan a lakna a ni tih a sawi.
Samagra Exhibition-ah hian stall 22 siam a ni a, heng stall-ah hian ULLAS chungchang leh Mizoram zirlaite tana Samagra Shiksha hnathawh hrang hrang phochhuah a ni. MBSE, SCERT leh PM Poshan hnathawh leh hmalakna phochhuah a ni bawk.