Akashwani Aizawl G20 pualin hmang

G20 puala Sustainable Development Goals inhrilhhriatna chu Akashwani Aizawl bultumin Zirtawpni khan buatsaih a ni.
He hun hmanpuitu minister Robert Romawia Royte chuan India chu G20-a president dinhmun a chan chhungin hruaitu tha tak a ni tih a sawi a. Mizoram mipui pawhin G20 intawhkhawm chu a tha zawngin a zar kan zo chho mek zel tih a sawi. “Mizoram Responsible Tourism Policy hi G20 hmalakna nen a inchawih hle a, hemi kawnga hmalakna kal mekah MNF sawrkar chuan hnam nihna tibo lo leh Mizote sakhua humhalh tlat chungin a kalpui dawn a ni,” a ti.
G20 hnuaia Y20 chungchangah Ministry of Sports & Youth Affairs hnuaiah hma lak niin, G20 leh Y20 hminga Mizoram sawrkar rawtna siam pawh ministry-in a pawmpui tawh tih Sports & Youth Services minister hian a sawi a. ‘Y20 meet on Nationalism and Development’ tih thupuia hmangin Mizoram district tam zawka college leh higher secondary zirlaite bulah hmasawnna atan nationalism a pawimawh tih an sawi thin thu a sawi bawk.
Cluster head, Akashvani Aizawl director DR Lalropuia chuan mitinte chu G20 auhla, khawvel pakhata chhungkaw pakhat, hmathlir inang nei kan ni tih hrereng chunga boruak tha hip tur leh tui thianghlim, tui hna tha neih a nih theih nan tidamtu, siamthatu leh vawngthatu kan nih a pawimawh tih a sawi a. Lei luangral tur venna atan tuiluankawr tha kan neih a ngai, tiin, mitinten ramngaw leh nungcha humhalh leh thingphun uar chu tih makmawh a ni tih a sawi a ni.
Pachhunga University College-a assistant professor Dr Daniel Lalawmpuia chuan G20 tobul leh a thiltum tlangpui sawiin, he hunah hian Akashvani thawktute leh sawm bikte an tel a ni.