Alacaraz sawptu Djokovic

Inrinni zan khan ATP finals 2023 semi-final khelh a ni a. Inkhel hnuhnung zawkah champion lai Novak Djokovic chuan a elpui lian Carlos Alcaraz a sawp a, Jannik Sinner hmachhawn turin final a lut. Final hi nizan dar 10:30 khan khelh tan a ni a, result kan tarlang hman lo.
Irinni zana semi-final hmasa zawk ah inelna neih meka khel tha tak, chak loh la nei lo Jannik Sinner chuan Red Group atanga tlang Daniil Medvedev a hmachhawn a, inkhel hmuhnawm takah 6-3 6-7 (4-7) 6-1 in hnehna a chang a, final a lut. Italian Sinner hian group match ah Novak Djokovic a lo hneh tawh a, final-ah hneh nawn lehin a vawi khat nan ATP Finals ah champion ngei a tum dawn. Sinner hi Italian zingah ATP Finals lut thei hmasa ber a ni a, a champion thei a nih chuan Italian zingah ATP Finals champon thei hmasa ber a ni ang a, record duhawm zawk a hnutchhiah ang.
Hmuhnawm takah Sinner leh Medvedev an inkhel hnu, zan reiah inkhel ngaihven hlawh zawk awmin, Red Group champion Carlos Alcaraz leh Green Group a pahnihna Novak Djokovic an inhmachhawn. Alcaraz leh Djokovic te hi inhnehtawk zet mai, an ni a, an thiam dun a, an huaisenin an tha a tha dun bawk si nen inkhel hmuhnawm an chhawp chhuak thin. Vawi li inhmachhawn tawha vawi hnih ve ve chak mek an nih vangin inrinni zana an inkhel pawh hian ngaihven a hlawh viau.
Inkhel ngaihven hlawh tak tan a nia, rinlawk ang ngeiin an inhnehtawk leh pek hle a, point khat hmu tur pawhin an beih fe a ngai zel. Bul tan chhe lo mah se a serve a hum zawh loh a tuar a, Alcaraz-a’n set khatna a hloh. Set hnihnaah Djokovic a khel tha lehzual a, break nei zawnin game hnih chauh hloh chungin set a la zui leh ta mai a. Beisei aia awlsama chakin, 6-3, 6-2 in Alcaraz a sawp a, ATP Finals-ah a vawi kua nan final a lut zui ta a ni.