An mualah Germany an chak lo

November 18, Inrinni zan khan Germany chuan an manager thar Julian Nagelsmann hnuaia an home game hmasa ber an khel a. Olympiastadion, Berlin-a an mikhual Turkey lakah 3-2 in an tlawm a, Nagelsmann-a’n an mualah ngei chhe takin bul a tan.
Football ram ropui Germany hian Hansi Flick hnuaiah beisei an phak loh vangin Flick hi September thla khan an ban a, a hmunruak luah turin Jullian Nagelsmann an la lut. Nagelsmann hnuaiah beiseina thar neiin, hnehna chang nghal mah se an muala an khelh hmasak berah erawh an mualpho thung. Germany hi Euro 2024 thlengtu tur an nih vangin qualifier an khelh buai a ngai lo a, friendly match an khel ve thung.
Olympiastadion-ah mualneitu Germany in bul an tan tha viau a, inkhel tan atanga minute ngana lekah Arsenal forward Kai Havertz chuan Leroy Sane siamsak atangin hmahruaina goal a thun nghal. Hma taka goal an thun vangin phur viau mah se Turkey er let an tuar lova, a tawp khar chhe zawkah an tang ta tlat thung.
Hma takah goal chhuah mah se Turkey an talbuai mai lova, tha taka inlan zuiin, chawlhlawk hmain hma an hruai let hman. Chawlhlawk dawn hnaih minute 38-naah Bardakci siamsak atang in Ferdi Kadioglu chuan goal a thun a, an si phurh a sut. An si phurh an sut vangin an phur thar viau a, mualneitu Germany an nawr na zui nghal viau bawk. An si phurh sutna goal an thun hnuin goal dang an thun belh leh thuai a, minute 45=2-ah Kenan Yildiz chuan Ayhan siamsak atangin hma an hruai letna goal a thun a, 2-1 a hmahruai chungin chawlhlawk an hmang.
Chawlhlawk hmaa hnufual zawka tang Germany hian an si phurh sut ngei tumin mual chhung an lut a, second half-ah bul pawh an tan chhe lem lo viau. Second half tan atanga minute lina lekah Niclas Füllkrug chuan Wirtz siam sak atanga goal thunin an si phurh a sut. Hma taka goal an thun leh vangin Germany hian an mualah chak theih ngei an inring a, phur tharna namen lo tak nen an mikhualte an nawr zui chiam a, an hun tha neih an chhawr tangkai zawh loh thin vangin goal dang an thun belh thei lo va, goal chhuah zawkah an tang leh ta hial zawk a, penalty an chawi.
Team lian Germany lakah huaisen taka inlan a, chak tum ngam Turkey chu hun tawp dawn hnaihah an che fuh nawn leh a, penalty an hlawhchhuak. Penalty an hmuh hi Yusuf Sari chuan minute 71-naah harsatna lian tawk lovin a pet goal a, hma an hruai nawn lehna goal a thun.
An mualah ngei hnufual zawka an tan nawn leh hnuin Germany in an si phurh sut ngei tumin tan an khawh zui nasa hle. A tawp an khar that theih loh an tuar a, goal dang an thun belh thei lo. Germany in goal thun tuma tan an khawh laiin Turkey in an goal neih chhun humhim tumin thapui an thawh ve thung a, inkhel hautak tak an hmachhawn. Hun tawp thlengin goal dang a luh belh thei lova, Nagelsmann home game hmasa berah Turkey ngam lovin an tlawm zui ta a ni. Germany hian Austria an hmachhawn zui leh ang.