Alcaraz-a’n No. 1 a hnaih

Thawhlehni khan ATP Finals khelh chhunzawm a ni a, Carlos Alcaraz chuan Taylor Fritz lehthalin hnehna a chang a, World No. 1 thar nih a hnaih leh zual sauh. Thawhleh zana inkhel dangah tualchhung tlangval Lorenzo Musetti chuan hnehna a chang ve bawk.
World No. 1 thar ni leh tura Group match a chak vek mamawh Carlos Alcaraz hian Taylor Fritz a hmachhawn a, set hloh hmasaah a tang. Set hloh hmasa zawkah a tan hnuin set hnihnaah tie-break an khel zui leh teuh viau bawk. Inkhel harsa takah a huaisenna leh a tlona a chhawr tangkai nawn leh a, phu takin hnehna a chang let.
Alcaraz leh Fritz te hi set khatnaah an inhnehtawk viau a, game an inlakchhawk zak zak. Set khatnaah hian break nei thei an awm lova, tie-break khelh a ngai. Tie-break-ah service tha thei tak Taylor Fritz a chungnung a, awlsam ang reng takin a mamawh point a hlawhchhuak a, set la hmasa zwkah a tang.
Set hnihnaah pawh an inhnehtawk zui leh viau a, game an inlak chhawk leh zak zak. Game an inlak chhawk zak zak hnnuin Alcaraz-an 6-5 in hma a hruai. Fritz-a’n a serve a hum a nih chuan tie-break an khel zui leh dawn. Tie-break khelh nawn leh hi Alcaraz tan a him lo thei viau dawn a, tlawm thei dinhmunah a ding. A serve hum a mamawh em em laiin Fritz a chesual zawn a, ho takin a tisual zawn. Boruak sang zo lo zawk a nih a tuar a, a serve a hum zo lova, uiawm takin set a hloh.
Set khat ve ve an lak hnuin boruak a inthlak thleng a, chak tura dinhmun tha zawka ding chu Alcaraz a ni. Phur leh huaisen taka inlan Alcaraz hian hun pawimawh takah break a nei leh ta mai a, chak turin a dinhmun a siam tha. Fritz hian break let tum viau mah se a hlawhtling zo lova, Alcaraz hneh tum viau mah se tlawm zawkah a tang leh ta nge nge. Inkhel hmuhnawm takah hian Carlos Alcaraz chuan 6-7 (2-7), 7-5, 6-3 in hnehna a chang ta a ni.
Alcaraz hian Italian Lorenzo Musetti a hmachhawn zui leh dawn a, a chak a nih chuan World No. 1 niin kum a khar dawn. Alcaraz hmaa ding tur Mussetti hian a khingpui Alex de Minaur chu 7-5 3-6 7-5 in a hneh.