Alcaraz-a’n Sinner a dang

Indian Wells khelh mekah champion lai Carlos Alcaraz a khel tha chhunzawm. Alcaraz hian a elpui lian; vawi 19 zet chak zawn tawh Jannik Sinner chak kaltluang lai a tihtawp sak a, final luh a tumna kawng a dang. Sinner hnehtu Alcaraz hian final-ah Daniil Medvedev a hmachhawn zui leh ang.
Semi-final-ah tunlaia ineltawk em em Carlos Alcaraz leh Jannik Sinner te inhmachhwan tur hian ngaihven a hlawh a, beisei lawk ang ngeiin inkhel hmuhnawm an lantir. Australian Open champion Sinner-a’n bul tan tha viau mah se Alcaraz lakah a khawng tluan zo lo.
Jannik Sinner hian Alcaraz lakah tha zetin bul a tan a, 2-1 hma a hruai laiin ruahin tibuai bawk mah se, set khatna hi 6-1 ngawtin a la zui ta tho. Awlsam taka set khatna a lak vangin Sinner hian Alcaraz a hneh a rinawm hman viau. Set khatnaah chiang kuang takin tlawm bawk mah se Alcaraz a insiamtha thuai a, hnehna changin a thochhual. Spaniard hian set hnihnaah break a neih a chhwr tangkai a, game thum hloh chungin set a la. Set khat ve ve an lak hnuin inkhel a hmuhnawm zui viau a, deciding set-ah Alcaraz chuan break vawi hnih a nei leh ta mai a, a elpui lian Sinner chu 1-6, 6-3, 6-2 in a hneh a, final a lut zui ta a ni.
Semi-final lehlamah Daniil Medvedev chuan set a hloh hmasak zet hnuin Tommy Paul a hneh let a, final a lut. Medvedev hian tualchhung tlangval Tommy Paul lakah bul a tan chhe hle a, set khatnaah game khat bak a la thei lo. Bul tan chhe viau mah se set hnihnaah a insiamtha a, tie-break-ah a chungnung a, set a la let. Harsa taka set a lak hnuin a khel tha chhunzawm a, set thumnaah game hnih chiah hlohin set a la leh ta mai a, 1-6, 7-6 (7-3), 6-2 a hnehna changin final a lut. Final-ah Carlos Alcaraz a hmachhawn leh dawn.
Final a inhmachhawn tur Carlons Alacaraz leh Daniil Medvedev te hi vawi nga an inhmachhawn tawh a, Alcaraz vawi thum a chak a, Medvedev-a’n vawi hnih hnehna a chang ve bawk. An intum hnuhnung vawi hnihah Medvedev hi a chak ve ve a. Indian Wells final-ah chak turin inrintawkna sang tak a nei ngei ang.
Indian Wells hmeichhe final-ah Maria Sakkari leh Iga Swiatek te an inhmachhawn ve thung dawn.
Hmeichhe semi-final-ah Maria Sakkari chuan US Open champion Coco Gauff chu paltlang hramin, 6-4 6-7 (5-7) 6-2 in a hneh a, final a lut. Semi-final lehlamah Iga Swiatek chuan a khingpui Marta Kostyuk chu awlsam zet; 6-2 6-1 in a hneh ve thung.